Les cifres negres d’entamu cursu (Comunicáu)

La primer ufierta de places que la Conseyería d’Educación fizo pal cursu 2019-2020 ye de 3009 puestos a desempeñar en réxime d’interinidá. Paez una ufierta pergrande, pero esos tres mil nueve puestos nun van dar trabayu a les casi 15.000 persones convocaes, nin siquier lo van facer a xornada completa: del total de places, 1.061 san ser contrataciones a tiempu parcial. (Nota: d’equí palantre, les cifres son  aproximaes porque’l mou poco afayadizu de presentar los datos per parte l’Alministración  torga un bon análisis d’ellos).

Tres los procedimientos selectivos del Cuerpu de Maestres (el femenín plural ye un reflexu de la feminización de la docencia nesti tramu de la enseñanza) que se celebraron esti branu, el varapalu a la ufierta de xornaes completes ye notable: 620 en total pa toles especialidaes, pero d’elles  554 son a media xornada. N’Educación Física, Música, Pedagoxía Terapéutica y Audición y Llinguaxe’l númberu de medies xornaes supera por demás la ufierta de xornaes completes al personal interino. Magar ye verdá que les oposiciones crearon 781 empleos estables, la realidá ye que nos llistaos resultantes del últimu procedimientu selectivu hai 455 aspirantes a interinidá con 40 puntos nel apartáu d’esperiencia docente previa, lo que significa que 455 maestres y maestros con 12 años, o más, d’esperiencia van siguir axuntando contratos temporales. Nel Cuerpu de docentes de Secundaria, pelo contrario, el personal interino vive un respiru, tamién temporal, suponemos, hasta que se publique otra convocatoria d’oposiciones. Les movilizaciones pola recuperación de les 18 hores lectives supunxeron una ufierta de 1.017 xornaes completes, frente a los 554 puestos a media xornada, ente los que sobresal el profesoráu de Llingua Asturiana, pero esti tema amerita un análisis particular.

Siguiendo coles cifres, el Cuerpu de Profesoráu Técnicu de FP tuvo una primer ufierta de 230 places (182 xornaes completes y 48 medies); el Profesoráu de les Escueles Oficiales d’Idiomes, 22 en total (20 completes y 2 medies); el Cuerpu y Profesoráu de Música y Artes Escéniques, 88 en total (74 completes y 14 medies); el Cuerpu de Profesoráu d’Artes Plástiques y Diseñu, 36 places en total (30 completes y 6 medies) y, pa finar, nel Cuerpu de Maestros de Taller la ufierta foi de 5 puestos con xornada completa y 3 con media xornada.

Mención aparte amerítala la situación del personal docente qu’imparte l’asignatura de Llingua Asturiana tanto na etapa de primaria, como na de secundaria; de les 179 vacantes ufiertaes en Primaria, namás 34 son a xornada completa, y de les 145 medies xornaes restantes, 21 son, amás, itinerantes. En Secundaria la situación ye similar: 74 puestos en total, de los que namái 4 tienen xornada completa.

Les medies xornaes, dalgunes, pa enriba, itinerantes con dos o más centros nel casu del Cuerpu de Maestres, suponen unos ingresos brutos y ensin antigüedá de, aproximao, 1.062€; 1.162 € en FP y 1.205 en Secundaria. Esta situación implica, en abondos casos, gastos d’agospiu y mantención fuera de casa y/o’l desplazamientu correspondiente. Cuando la Conseyería d’Educación y los Equipos directivos de dellos centros llancen al aire insinuaciones sobre’l sibaritismu del personal interino porque, dacuando, los puestos ufiertaos nun se cubren darréu, tendríen d’esplicar tamién les característiques d’esos puestos.

Toos  y toes sabemos qu’hai medies xornaes nes que la trabayadora, o’l trabayador, gasta más dineru del qu’ingresa.

Avisu a navegantes, cuando na axudicación de places del próximu vienres, 30 d’agostu, resulten ermes dalgunes d’elles, tengan en cuenta la diversidá casuística.

Uviéu/Oviedo 28 d’agostu de 2019