SUATEA denuncia temperatures ilegales nel CPEE Latores y otros centros educativos.

El sindicatu esixe actuaciones urxentes nos centros de titularidá municipal y señala como casu especialmente grave el del Centru d’Educación Especial de Llatores/Latores, n’Uviéu.

SUATEA denuncia que l’actual episodiu d’altas temperatures ta poniendo en evidencia, una vegada más, la falta de previsión y caltenimientu en numberosos centros educativos asturianos. En varios colexos e institutos tán algamándose temperatures incompatibles con unes condiciones dignes y segures de trabayu y enseñanza.

El sindicatu recuerda que’l Real Decretu 486/1997, sobre disposiciones mínimes de seguridá y salú nos llugares de trabayu, establece que nos locales zarraos onde se realicen trabayos sedentarios la temperatura tien de tar ente 17 y 27 ºC, y ente 14 y 25 ºC en trabayos llixeros. Amás, la norma esixe evitar temperatures extremes, incomodidá térmica y radiación solar escesiva a traviés de ventanes o cristales. Por tanto, superar esos valores nun ye una simple molestia: supón incumplir les condiciones mínimes de seguridá y salú llaboral.

Un casu especialmente preocupante ye’l del Centru d’Educación Especial de Llatores/Latores, n’Uviéu, onde les deficiencies estructurales agraven el problema. La situación nun yera desconocida: yá el mes pasáu s’alvirtió na prensa d’actuaciones pendientes, como’l cambéu de los toldos de les ventanes, reclamáu con urxencia poles families porque les aules yá algamaren temperatures elevaes. Nun centru d’Educación Especial, onde parte del alumnáu puede presentar mayor vulnerabilidá al calor, esta desidia resulta entá más grave.

Mañana Uviéu celebra’l Martes de Campu, col tradicional bollu preñáu y la botella de vinu. Dende SUATEA esperamos que l’alcalde disfrute la fiesta, convenientemente a la solombra, anque cuesta creer que unos toldos pa un centru educativu sean muncho más caros que esi convite institucional, mientres el alumnáu y el personal educativu siguen soportando aules recalentaes.

El problema nun se llinda a Llatores. Afecta a más centros d’Asturies, especialmente de titularidá municipal, onde la falta d’inversión en caltenimientu, aisllamientu, ventilación, protección solar y renovación d’instalaciones repítese añu tres añu. Cada episodiu de calor vuelve amosar les mesmes carencies: ventanes ensin protección abondo, patios ensin solombra, aules mal orientaes, edificios envellecíos y ausencia de planes eficaces d’adaptación climática.

SUATEA recuerda que esta situación tien el so reversu n’iviernu, cuando en numberosos centros el problema son el fríu nes aules, les calderes que fallen y les reparaciones que lleguen tarde. Nun puede ser que’l confort térmicu dependa de la suerte, de la orientación del aula o de que una caldera aguante una selmana más.

Por too ello, SUATEA esixe a la Conseyería d’Educación, al Conceyu d’Uviéu y al conxuntu d’alministraciones responsables actuaciones inmediates: midiciones de temperatura, midíes urxentes cuando se superen los llendes llexales, instalación de toldos y sistemes de protección solar, revisión de la ventilación y l’aisllamientu, y un plan estructural pa adaptar los centros educativos asturianos a una realidá climática cada vegada más extrema.

La escuela pública nun puede siguir funcionando en edificios que n’iviernu son fríos y en primavera conviértense en fornos. Garantizar condiciones térmiques dignes nun ye un luxu: ye una obligación llegal, llaboral, educativa y sanitaria.

SUATEA esixe soluciones yá. Nin aules-fornu en mayu nin aules-nevera en xineru.