28 de mayu Día internacional de l’acción pola salú de les muyeres

Esta entrada está disponible en: Castellano (Castellanu)

El papel de la muyer dientro de la sociedá, xeneralmente, ye d’un menor estatus social qu’el del home, traducíu automáticamente nuna relación de poder desigual. Un exemplu bien claru, la muyer atópase en total inferioridá de condiciones na familia, la comunidá y la sociedá polo xeneral; tien un menor grau d’accesu a los recursos y a la so xestión; y yá nun falemos de tomar decisiones, que tien menos pesu que la d’un home. Toos estos factores contribuyeron a que se dea por fecha la salú de les muyeres y a que nun se-y empreste l’atención que merecen.

La introducción de la perspectiva de xéneru dientro del ámbitu sanitariu supunxo una gran meyora  a la d’entender los problemes sanitarios de la muyer y determinar les distintes actuaciones en toles edaes. L’exemplu más claru atópase nes enfermedaes cardiovasculares, que son una de les grandes causes de mortalidá femenina, pero de les que nun se tien abonda conocencia, produciendo un atrasu nos tratamientos y formes de diagnósticu pal colectivu femenín.

Afitándonos na situación actual de postconfinamientu, l’informe redactáu pol Institutu Catalán de les Muyeres rescampla la influencia desigual que tuvo la pandemia en muyeres y homes. Nesti mesmu informe refléxase que la situación foi peor pa elles. Polo xeneral les muyeres puntuaron más alto en percentiles de: percepciones, estaos d’ánimu y esmoliciones que los homes. Les muyeres dicen sentise tamién más nervioses, murnies, intranquiles y atristayaes que’l colectivu masculín. Según un estudiu del IESE ( Bussiness School de Navarra) les muyeres que trabayaron na primer parte de la pandemia sufrieron un 20% de fatiga mental y un 16% d’estrés más que los homes, por cuenta de la mayor dedicación al cuidu de los fíos/es o familiares dependientes, esto teniendo en cuenta a un nucleu familiar de 2 proxenitores, porque cuando falamos de families monoparentales la situación empiora, aumentando nun 13% la fatiga mental sobro’l percentil anterior, y un 2% sobro’l d’estrés.

Si yá había una gran diferencia na carga de xeres doméstiques y el cuidu de la familia, la pandemia  perpetuóles y empioróles, cuestión qu’inda sigue invisibilizada. El fechu de tener fíos/es ye un factor bien relevante, independientemente del nivel d’estudios del que falemos; les muyeres destinaron un esfuerzu suplementariu ensin compartilu.  

La conciliación ente la esfera privada y la pública ye unu de los grandes factores pa encarar la desigualdá ente home y muyeres. Cola imposición del teletrabayu manifestóse’l conflictu sufiertu pola muyer; lo que podría significar un pasu palantre na paridá, nun traxo a la conciliación llaboral esperada. La carga de les muyeres foi muncho más alta, enzancando la doble xornada que yá esistía na pre-pandemia, xenerando auténtiques dificultaes pa les muyeres.

Ente les muyeres más perxudicaes tán les muyeres migrantes en situación irregular, les víctimes del tráficu, les muyeres con diversidá funcional, les muyeres nos campos de refuxaos y toles muyeres que nun son atendíes y que ven frayáu’l so derechu a la salú por causa de los deficientes sistemes de salú pública.

Esiximos a la sociedá y a les Alministraciones, que pongan darréu solución a toes estes desigualdaes: aplicación de la perspectiva de xéneru na SANIDÁ; implementación de midíes efectives de CONCILIACIÓN que realmente llogren la corresponsabilidá, y l’esaniciu de cualquier tipu de VIOLENCIA CONTRA LA MUYER.

Vienres, 28 de mayu de 2021

Organización de Muyeres de la Confederación Intersindical

Secretaría de la Muyer de SUATEA

Print Friendly, PDF & Email

Esta entrada está disponible en: Castellano (Castellanu)