25 P – Día Internacional pal desaniciu de la violencia sobro les muyeres”

Dende la Organización de Muyeres de SUATEA y de la Confederación Intersindical un añu más tenemos que conmemorar el 25 de payares, y recordar al mundu enteru que la violencia contra les muyeres nun cesa.

Desque se recueyen datos relativos a les muyeres víctimes de terrorismu machista fueron asesinaes 950 muyeres. No que va d’añu 2018 fueron asesinaes 39 muyeres, ensin cuntar a aquelles asesinaes fuera de les rellaciones de pareya, nesti casu’l númberu xube a 77, y ye alarmante l’aumentu de menores asesinaos polos sos padres, 8 neñes y 2 neños cola única intención de facer el mayor dañu posible a la so pareya o expareja, toos estos datos recoyíos a fecha 5 d’ochobre (https://feminicidio.net/).

Posiblemente nesti momentu yá aumentara’l númberu de víctimes pues el terrorismu machista ye una lacra social que nun paez ser importante na sociedá. Solo fai falta ver les estadístiques sobro lo qu’esmolez a la ciudadanía y la violencia escontra les muyeres ocupa’l puestu 18 na percepción de los principales problemes d’España según el CIS https://goo.gl/sj6iAQ  ¿Cuálu ye l’orixe d’esta falta d’esmolición? L’orixe ta nuna sociedá patriarcal onde’l varón, pol simple fechu de ser home, naz con unos privilexos que les muyeres nun vamos consiguir ensin una gran llucha y xuna gran revolución. Inda ye común ver na sociedá l’apreciación de que la violencia escontra les muyeres nes relaciones de pareya ye daqué priváu y que nun tenemos que “metemos”. Tamién ta socialmente instaurada la idea de que la muyer pasa a ser “dependiente” del home en cuanto empiecen relaciones de pareya. Los estereotipos patriarcales tán tan arraigonaos que ye difícil desarraigonalos.

L’únicu camín para erradicar la violencia ye un cambéu social onde les muyeres tengamos los mesmos derechos y síamos consideraes ciudadanes de primera, como los homes. Una sociedá onde nun sía necesariu falar de les cuotes porque les muyeres asuman puestos de responsabilidá nes empreses. Una sociedá onde nun se cuestione de cutiu la valía de les muyeres y onde nun se nos someta a un esame del nuesu aspeutu físicu y onde los roles sexistes desapaezan. Una sociedá onde la xusticia patriarcal nun esista y sintamos realmente protexíes, porque ¿qué muyer que ta sufriendo violencia machista va denunciar si aquelles persones que nos tienen que protexer nun tienen perspectiva de xéneru y automáticamente mos traten como culpables y non cómo víctimes?

Les muyeres tamos fartes de ser ciudadanes de segunda, tamos fartes de que nun se nos tenga en cuenta y nun se nos valore, tamos fartes de tar siempres cuestionaes y de cutiu esaminaes. Por eso tamos tomando les cais y tamos faciéndonos oyer, tamos aliándomos porque sabemos que xuntes somos más fuertes. Salimos a la cai’l pasáu 8 de marzu pa demostrar qu’ensin nós el mundu párase. Ocupamos les cais pa denunciar la xusticia patriarcal en casos como’l de “la menada” o “Juana Rivas”, tamos vixilantes y denunciamos toos y caún de los casos de violencia que sufrimos les muyeres.

El movimientu feminista llegó pa camudar esta sociedá y nun vamos afloxar nel nuesu enfotu hasta que los llogremos. Somos muyeres, tamos avezaes a lluchar pa consiguir el nuesu llugar nel mundu y néso vamos siguir. Nun tamos soles, somos munches, tanto dientro como fuera d’esti país, nun hai qu’escaecer a les compañeres arxentines que siguen na so llucha por consiguir un albuertu llibre, seguru y gratuitu, y qu’algamaron sofitos de muyeres de toles partes del mundu. Queremos que les violencies machistes sían consideraes un problema social importante y equí ye onde les compañeres periodistes tienen un papel relevante, dando perspectiva de xéneru a toles noticies y denunciando aquelles situaciones que vayan contra los derechos de les muyeres. Muyeres deportistes, xuristes, universitaries…, tamién alcen la so voz y denuncien el machismu. Porque ye fundamental facer visible el problema pa da-y soluciones y concenciar a la sociedá.

Ye fundamental esixir formación n’igualdá nos centros educativos pa evitar tresmitir estereotipos sexistes, asina como formación en feminismu pa toles persones qu’intervienen con muyeres víctimes de violencies machistes.

Por eso, dende la Organización de Muyeres de SUATEA y la Confederación Intersindical tenemos claro que les muyeres xuntes y combatives vamos acabar cola violencia patriarcal.

Nesti enllaz pueden descargase el Manifiestu y les Unidaes Didáctiques propuestes para trabayar en redol al 25 de payares (Día Internacional pal desaniciu de la violencia contra les muyeres) nes distintes etapes educatives.