15 d’ochobre Día de la Muyer Rural

Nuna crisis ecosocial ensin precedentes como l’actual, faise más necesario que nunca visibilizar a les muyeres que s’atopen nel entornu rural y reivindicar el so derechu al trabayu en condiciones dignes y a una mayor participación social, aspeutos nos que s’atopen entá con mayor desigualdá que les muyeres urbanes.

La so contribución al desarrollu sostenible, cola meyora de los procesos agrícoles pal cuidu de la tierra y de la vida ta fuera dubía. Ye menester caltener la so aportación p’atopar caminos que dexen un desarrollu sostenible y protexer, asina, la salú del nuesu planeta y la de los seres vivos que lu habitamos.

Nesti sen, ye fundamental el trabayu que desendolquen les maestres rurales, faciendo posibles procesos de participación que permitan cuestionar modelos sociales patriarcales y plantegar una coeducación pa que les neñes y neños apriendan y participen n’igualdá nel caltenimientu y desenvolvimientu del so entornu.

La crisis ecosocial afeuta de forma desigual según la parte de La Tierra na que nacieres y esa afeutación resulta siempres más perxudicial pa les muyeres, porque son elles quien s’encarguen de consiguir agua nel 80% de les viviendes ensin accesu a l’agua, quien s’encarguen de l’alimentación de les criatures, quien lluchen por cultivar la tierra que-yos pertenez frente a compañíes extractives y gobiernos corruptos, etc.

Dende la nuesa Organización de Muyeres de CI queremos visibilizar toos estos trabayos visibles ya invisibles, estima-yos tolo que faen por curiar aspeutos fundamentales pa la vida y reivindicar el derechu a condiciones llaborales dignes. Una de les claves p’algamar un futuru posible ta nel mediu rural, y polo tanto ta y va tar nes sos muyeres.

Dende la Secretaría de la Muyer de SUATEA sofitamos el trabayu de les muyeres indíxenes de Colombia y la so llucha por caltener y protexer la tierra.

    Organización de Muyeres de la CI

Secretaría de la Muyer

  15 d’ochobre de 2020