Una agresión nueva al colectivu de personal interino

L’adaptación del alcuerdu d’interinidá que firmaron los sindicatos CC.OO, UGT y ANPE supón una agresión nueva al colectivu de personal interín. Si l’alcuerdu del 2014, que SUATEA negóse a firmar, yera un mal alcuerdu pal personal interín, esta modificación supón una vuelta de tuerca qu’implica que munches compañeres y compañeros puedan vese na cai. Pareznos que’l llabor fundamental d’un sindicatu ye defender a les y los trabayadores, non firmar alcuerdos cola Alministración que precaricen cada vez más la situación del profesoráu. Con esti alcuerdu que NAMÁS SUATEA negóse a firmar:

• Nun se contempla modificación alguna pa iguar la repercusión de la barbaridá de baremu establecíu nel Real Decretu 270/2022 que penaliza’l fechu de tener trabayao en distintos cuerpos y especialidaes (RD que recurrió’l  SUATEA al Tribunal Supremu). Por eso, nes llistes nueves d’interinidá los años trabayaos n’otra especialidá va contar la metá. Y los años trabayaos n’otru cuerpu, van contar exactamente igual que los trabayaos nuna empresa privada-subvencionada. Un ataque claru a les y los trabayadores de la pública, que son quien sufrió l’abusu de contratación de l’Alministración. Curiosamente, atopámonos conque, en cuenta d’ello, amagóstase pa qu’entre’l personal docente d’una empresa privada pa ocupar los puestos públicos a costa del profesoráu interín. 
• La obligatoriedá de presentase a les oposiciones impide al profesoráu entrar nuna llista nueva, siempre qu’esa especialidá se convoque a la vez que la suya. Na práctica, esto quier dicir que ye casi imposible qu’un maestru/a pueda entrar en varias llistes del so cuerpu, o un/a de secundaria nes llistes del suyu. 
• Con esti alcuerdu, el profesoráu técnico de FP interín con titulación non universitaria va quedar al paru pa siempre a partir del 31 d’agostu. Al contrario de lo que pasa n’otres comunidaes autónomes como Castiella y Lleón, el País Vascu o Cantabria, ente otros.
• Curiosamente, lo que sí se sigue blindando son los cursos de formación qu’algunos d’estos sindicatos venden, faciendo de la formación un negociu.

La gravedá de lo firmao ye tan grande, que nun nos diba extrañar ver pronto a alguna de les organizaciones sindicales firmantes intentando excusase o tratando d’igualo. Nun hai que remociar nada si nun lo rompieren primero y, de toles maneres, namás van pelear por poner parchucos que van dexar la mayor parte d’estas barbaridaes como taben.

El Secretariáu de SUATEA

Uviéu 13 de febreru de 2023