SUATEA refuga la presencia militar nel IES Río Trubia

La promulgación de diferentes lleis educatives, 8 lleis diferentes en cuarenta años, dio siempre muncho que falar no que cinca a cómo trasladar al alumnáu una formación encontada nel respetu a los valores democráticos, constitucionales y los derechos humanos. Insistióse munches veces que la educación nun podía convertise nel terrén de les disputes partidistes, pero eso nun quitó pa que la derecha política entamase campañes contra la implantación d’asignatures, como’l casu d’Educación pa la Ciudadanía y los Derechos Humanos. 

Sin embargo, cada vez son más los elementos reaccionarios que piensen que la escuela ye un campu d’adoctrinamientu, y exemplu d’ello ye la iniciativa que sal de la dirección del IES Río Trubia en collaboración cola Delegación de Defensa y l’Ayuntamientu d’Uviéu. Esta actividá sentó bien mal ente’l claustru, y hay docentes que dicen que nun van participar nuna pantomima medática onde s’instrumentaliza lo mesmo al profesoráu como al alumnáu. Nun se busca nengún oxetivu educativu nuna actividá que pa nada casa colos valores cívico-democráticos qu’ha recibir l’alumnáu.  

Si l’oxetivu real fuera impulsar l’hermanamientu colos pueblos d’América Llatina, había actividaes muncho más inclusives qu’esti tipu d’actos con connotaciones de calter exclusivamente neocolonial. 

Dende’l SUATEA nun vemos que proceda facer celebraciones militares nos centros escolares. Cuarenta años depués, sigue siendo complicao algamar unos valores constitucionalistes qu’integren a tola sociedá. El día que resolvamos esta cuestión, ye que dimos un pasu en condiciones a un patriotismu cargáu de valores universales como’l respetu a la igualdá, la diversidá o la mentalidá crítica.

Uviéu, 10 de ochobre 2023