Primer xunta ente Educación y sindicatos sobro desburocratización

Esta entrada está disponible en: Castellano (Castellanu)

Ayeri tuvo llugar la primer xunta del llamáu “Grupu de trabayu pa la simplificación alministrativa de les xeres del profesoráu”, ente Educación y sindicatos docentes de la rede pública . SUATEA allegamos a la convocatoria cola esperanza de que’l Director Xeneral de Personal Docente concretáranos lo anunciao nuna cita anterior. Lo cierto ye que salimos cola constatación de les bones intenciones d’esta Dirección Xeneral, pero ensin nenguna midida d’aplicación inmediata .

El cambéu más ambiciosu y de mayor repercusión pal profesoráu asturianu de tolos anunciaos, y pol que felicitamos a la Conseyería , ye la sustitución del programa de xestión SAUCE por una nueva plataforma . Paez que se pretende que sirva , de primeres, pa simplificar y evitar duplicidades a la de rexistrar les ausencies del alumnáu , y tamién pa facilitanos los procesos d’evaluación, de tala manera que nun tengamos que recurrir a programes esternos (Additio, Idoceo…) que , a éstes y como reconoció el mesmu Director Xeneral, nun presenten toles garantíes de seguridá que deberíen tocantes a protección de datos.

Otros cambeos que valoramos bien positivamente son la simplificación de documentos de centru (PGA, memories o actes); la simplificación del procesu de solicitú de sofitos fuera de l’aula, que foi una de les principales demandes del profesoráu de PT, AL, PSC y Orientación anguaño; la meyora nel procesu de xestión d’ordes de comisión de les itinerancias, de tala manera que se automatice lo más posible el procesu y evítese burocracia innecesaria a los equipos directivos; y, d’últimes la posibilidá de que’l profesoráu interín firme los sos nomamientos digitalmente, evitando molesties y desplazamientos innecesarios.

La parte más negativa ye que, magar el clima de trabayu con esta Dirección Xeneral paeznos más que correctu, la Conseyería sigue cola so política de “tomamos nota y estimamos aportaciones”, pero , polo xeneral, nun paez qu’haya muncha voluntá de llevar a cabu nenguna de les midíes que propunximos dende les organizaciones sindicales. Per parte de SUATEA, aportunamos en que lo más urxente ye invertir en personal alministrativo qu’atienda a tolos centros educativos asturianos. D’esta forma , podríase-yos por fin quitar a los equipos directivos una xera que creemos que ye a les clares impropia : realizar la xestión económica , colo que supon tener qu’usar esa velea de programa de xestión llamáu GICE. Tamién aportunamos en daqué que llevamos años demandando: qu’a tolos equipos directivos unipersonales incorpórese siquier otra persona que desempeñe funciones de secretaría. A lo último, quixímos apurrir otros pequenos cambeos que nun costaríen muncho y que nos quitaríen muncho trabayu:

  • La unificación de criterios a la de xestionar los problemes de conducta del alumnáu , de tala forma que esaníciense trámites que , en munchos casos, lo único que consiguen ye desmotivar al profesoráu a la d’actuar. Esto ameyoraría amás el clima de trabayu nos centros.
  • Esaniciar duplicidades y documentación innecesaria a la de xestionar PTIs, adaptaciones curriculares o planes p’alumnáu que vuelve cursar l’asignatura. Tolos documentos que tengan conteníos repitíos y nun apurran nada tanxible al procesu d’enseñanza-aprendizaxe tienen de sumir.
  • Facilitar la xestión de les factures a los equipos directivos, de tala manera que s’esanicie la obligatoriedá d’incluyir un númberu ingente d’anexos, firmes dixitales… que faen que s’eternice el tiempu emplegáu en tramitar documentos .

De segundes, nenguna de les propuestes principales va ser d’aplicación inmediata . La nueva plataforma que sustituya a SAUCE nun va tar llista antes del cursu 2025/26 nel meyor de los casos, y va retrasase hasta el 26/27 pa les funcionalidades qu’afecten a los equipos directivos. Sobre la simplificación de documentos de centru , va decidir el Serviciu d’Inspección Educativa , que , magar tien cuenta de tenelos llistos pal cursu próximu , nun esiste compromisu dalgunu de qu’asina sía . Sobre el restu d’anuncios, quedamos a la espera de futures xuntes. Aportunamos en que les bones intenciones deben de dir acompañaes d’actuaciones que tengan una incidencia real ya inmediata sobre la sobrecarga de trabayu del profesoráu asturianu . Si nun se cumplen les nueses demandes, la nuesa única opción a futuru va ser la movilización permanente .

Print Friendly, PDF & Email

Esta entrada está disponible en: Castellano (Castellanu)