SUATEA énte la propuesta de reforma del Estatutu d’Autonomía

El SUATEA llamentamos que’l PP siga encerríscándose na so postura inmovilista tocante a la oficialidá. Paez ser que lo que ye bono al oeste de la Ría del Eo ye malo al este, lo que crea riqueza y concordía en Galicia produz enfrentamientu y probitú n’Asturies. 

Magar que pasa’l tiempu y la mayoría social asturiana reivindica la oficialización de les sos llingües propies, la posición del PP  nun camuda: considera la oficialidá como una imposición a los asturianos d’una llingua, la oficializada, a la vez que va xenerar una xebra y enfrentamientu social ente la ciudadanía asturiano. 

Esta visión distópica d’un futuru con oficialiciación de les nuestres llingües  propies onde les persones s’engarrien, o ónde se-yos impón l’usu d’una o otra, choca frontalmente coles realidaes peninsulares de los territorios onde convive en perfecta harmonía la ciudadanía qu’emplega una o más llingües: en Portugal mirandés (asturllionés), Vall d’Arán (castellán, catalán y aranés), País Vascu (castellán y euskera), País Valencianu (Valencianu y castellán), Cataluña y Baleares (Catalán y castellán) o la nuestra allegada Galicia onde lleva gobernando’l PP décades (gallegu y castellán). 

De siguir na so postura inmovilista, el PP, como bon conservador que ye, asegura la pervivencia del pasáu y el presente, nun futuru de discriminación llingüística de los/les falantes d’asturianu y gallego-asturiano convirtiéndolos en perpetuos ciudadanos y ciudadanes de segunda n’Asturies, y nel estáu español. El PP entá nun quier almitir que la oficialidá nun ye otra cosa que la xusta reconocencia de derechos a una parte de la sociedá que los tien vulneraos. 

Gracies al puxu de los movimientos sociales de reivindicación llingüística fuimos a trespasar les demandes d’oficializacion y normalización al ámbitu políticu institucional col cambiu históricu de postura del PSOE, agora favoratible a la oficialidá, y l’asunción del calificativu d’asturianistes tamién per parte del PP y PSOE. 

L’asturianismu del PP ye un asturianismu esquizofrénicu. Afirmen querer muncho les nuestes llingües, sicasí ponen tantos peros al so amor que se tresforma nun odiu manifiestu: nun se puen imponer eses llingües artificiales, con elles adoctrinen, nun son llingües son inventos, son dialectos, hai munchos bables, nun se puen tirar les perres na so enseñanza o promoción… El so reciente y falsu asturianismu pervierte esti conceptu pa convertilu  en cachopismu, en folclorismu festexeru de pin y pañuelu qu’escuende un autoodiu persistente a les nuestres señes identitaries.

L’asturianismu del PSOE y  Barbón, como él mesmu asegura, hai que demostralu con compromisos y fechos. Como presidente y líder del partíu mayoritariu del gobiernu tienen muncho por facer: cumplir en tolos términos la Llei d’Usu;  aplicar nel territoriu la oficialidá de los topónimos; asegurar la presencia del asturianu y el gallego-asturiano na RTPA como mínimo nes mesmes condiciones que’l castellán; o dignificar la enseñanza de les nuestres llingües y les condiciones llaborales precaries del so profesoráu puxando pol reconocimientu de la especialidá, la estabilización de los puestos y l’accesu a la función pública. La oficialidá ye mui importante, la normalización y l’acción: imprescindibles.