El Ministeriu d’Educación desprecia les propuestes del profesoráu na reforma del Concursu de Tresllaos estatal

• La negociación del tercer borrador remata ensin alcuerdu , impónense les propuestes continuistas de les conseyeríes territoriales.
• L’intentu de retener a cargos directivos alzando la so puntuación, evidencia el fracasu d’unes polítiques educatives que faen de la xera d’enseñar y de dirixir un centru escolar, un cometíu cada vez menos demandáu.
• Na vida llaboral d’una o un docente son dos los finxos más relevantes a nivel personal: consiguir superar les oposiciones con plaza y algamar un destín deseyáu ; xuna verdadera carrera de torgues llarada d’innumberables entueyos burocráticos.

El 9 de mayu del 2024 remataba con un tercer borrador, el cambéu del Real Decretu 1364/2010, del 29 d’ochobre, pol que se regula’l concursu de tresllaos d’ámbitu estatal del personal funcionariu de los cuerpos docentes contemplaos na Llei Orgánica 2/2006, del 3 de mayu, d’Educación y otros procedimientos de provisión de places a cubrir polos mesmos, na Mesa de Negociación del Personal Docente Non Universitariu. Dichu concursu -conocíu como CGT– realízase cada dos años porque’l cuerpu de docentes ye estatal y toles CC.AA. tienen de rexise pol mesmu baremu cada dos años, anque nos concursos territoriales sí que puede haber cambeos.

Na vida llaboral d’una o un docente son dos los finxos más relevantes a nivel personal: consiguir superar les oposiciones con plaza y algamar el destín deseyáu . Los datos que reporten los programes estadísticos son bien claros, pos la gran mayoría de les noticies nes páxines web más visitaes de los sindicatos educativos -con muncha diferencia- falen del interés por estos dos temes; de la mesma, les reclamaciones, recursos d’alzada y contenciosos alministrativos, tamién tienen que ver con estes cuestiones. El Ministeriu sigue ensin atender reivindicaciones xustes que la parte social repite cada Mesa de (non) negociación, entrín y non, la Xusticia atópase afogada pola incompetencia d’unos pocos. STEs-i reivindica mayor claridá normativa pa que la interpretación del RD 1364/2010 nun acabe con miles y miles de reclamaciones que les y los docentes interponen cada concursu .

El Ministeriu despreció les propuestes del profesoráu p’acabar cola conflictividá xurídica,   mientres qu’almitió les de les conseyeríes territoriales que tienen que ver con poner un parche a los problemes qu’elles mesmes xeneren. Dicía Groucho Marx: “La política ye l’arte de buscar problemes, atopalos, faer un diagnósticu falsu y aplicar después los remedios enquivocaos”. Ponemos por casu la medría cada vez mayor de la burocracia na enseñanza, na práctica , el desempeñu profesional docente traducióse n’infinitos entueyos burocráticos: rellenando documentos innecesarios; faciendo trámites alministrativos impropios, ellaborando y rellenando formularios, estadístiques y informes; participando en planes alloñaos de la realidá de los centros y, poques gracies, refaciendo toles programaciones. Esta progresiva burocratización alloña al profesoráu de l’actividá pedagóxica. Pídese-y amás que se forme, fuera del so horariu lectivu , en cómo intervenir en casos de violencia, amás de tener habilidaes de lideralgu y d’intelixencia emocional y, a ser posible, con formación específica en maltratu infantil intrafamiliar, absentismu escolar, violencia machista, violencia intrafamiliar, acosu y ciberacosu, consumu de sustances y prevención del suicidiu y les autolesiones. Too esto tase implantándose a costo cero, a cencielles sumando les funciones a les y los docentes, en cuenta de contratar a personal especialista, nun contestu agraváu pol deterioru de la salú mental del estudiantáu tres la pandemia. Tán trabayando más que nunca ensin qu’esi sobreesfuerzu tenga efectos positivos nes y los estudiantes.

A cuenta too ello casi naide quier ser equipu directivu nin cargos asimilaos, y envede facer el diagnósticu correctu de la situación, el Ministeriu acepta -a propuesta de los políticos que verbenen poles conseyeríes- “destopar” el máximu de puntos d’esi a apartáu y aumentar la valoración de los subapartados. STEs-i talanta que van siguir les “dimisiones” d’equipos directivos porque nun s’iguen les causes de los problemes. Nun ye casualidá que la xera d’enseñar, sobremanera na secundaria obligatoria , atópese selmana sí y selmana tamién con llistes de sustituciones ensin aspirantes, incluso l’alministración mira pa otru llau al requisitu del Máster n’Educación si quier tener los llunes nes aules al alumnáu con docentes. La escuela pública nun pasa pol so meyor momentu, según la UNESCO, faen falta 44 millones de docentes dende equí hasta 2030 pa cumplir col “Oxetivu de Desenvolvimientu Sostenible 4” de la ONU, pa ser a ufiertar una educación de calidá a toes y toos. El grupu d’Altu Nivel respecto al oficiu docente qu’organizó’l Secretariu Xeneral de la ONU -António Guterres- demostrólo: la precariedá del profesoráu nun ye un problema de países en víes de desarrollu, ye un problema mundial y l’Estáu español nun ye nenguna esceición. Esti problema asocede en toles provincies del nuesutr país, en toa Europa y nel restu del mundu . Como yá espunximos n’anteriores artículos sobro el cambéu del CGT, caltuviéronse les dificultaes que vienen d’equiparar les enseñances privaes de los idiomes a les Escueles Oficiales públiques  y na  retirada de la llimitación del númberu de máster a baremar procedentes – mayormente- d’universidaes privaes con poco rigor académicu; la gran mayoría de cambeos son obligaos por sentencies xudiciales, como la del personal interín o pol acomodamientu al desarrollu curricular de la LOMLOE, como nel casu de la creación de nuevos cuerpos de Formación Profesional y la nueva Llei d’Enseñances Artístiques superiores. En documentos axuntos faemos un analís técnicu pormenorizáu de tolos cambeos propuestos.

Ver tables e informe na web de la Confederación de STE