Espina, la conseyera de la concertada

Lydia Espina sigue comportándose como la conseyera de la enseñanza concertada. Na negociación del alcuerdu pa la meyora de la calidá y el mantenimientu del emplegu que ta calteniendo colos sindicatos y la patronal de la concertada supón da-y más dineru público a empreses privaes, la mayoría de calter relixosu. 

Pa esti añu 2024 son más de 105 millones d’euros (un 5’55 superior a la del añu pasáu) los que se presupuestaron pa la enseñanza concertada, y muncho nos tememos que pal siguiente siga medrando la partida. 

Una de les concesiones ye destinar recursos públicos pa cubrir les hores llectives destinaes a desendolcar funciones directives  n’empreses privaes, mientres los centros públicos tán afogaos de carga horaria, burocracia y falta d’hores pa les llabores de los equipos directivos. Ye especialmente sangrante nos centros onde les direcciones son unipersonales y amás del llabor docente tien qu’asumir tola xestión una persona sola.

Col dineru público dase tamién la oportunidá de caltener l’emplegu nos centros concertaos de la siguiente manera: nel casu de supresión d’unidaes, na enseñanza privada-concertada amplíase la ratio profesorado-unidá, cuando na pública suprímese la unidá y darréu un puestu de trabayu. 

Por si la desigualdá de tratu de la Conseyería ente la escuela pública y la concertada fuera poco, van ameyorar les condiciones pal mantenimientu del emplegu de les sos trabayadores nes empreses según l’antigüedá, mientres nos procesos d’estabilización pol abusu de contratación de la propia Alministración dexaron que cualesquier persona pudiera participar (interina o non) y dende llueu nun fue la esperiencia docente previa nun centru públicu’l requisitu preferente pa caltener l’emplegu. 

El SUATEA vamos siguir denunciando la política de conciertos que nun ye otra cosa que siguir financiando negocios privaos, y a la ilesia, con dineru público de manera innecesaria.