Comunicáu tras la reunión Conseyería – Xunta de Personal

Na xunta fecha ente representantes de la Conseyería d’Educación y la Xunta de Personal, l’Alministración presentó una nueva regulación pa ellaborar les llistes de profesoráu interín depués de les recientes oposiciones docentes. SUATEA, que yá s’opunxera xunta’l colectivu

del profesoráu interín al alcuerdu robláu por dos organizaciones sindicales cola alministración per aciu de movilizaciones nesti cursu, sigue refugando la regulación que se deriva d’esi alcuerdu y que puede suponer qu’una parte del profesoráu interín que trabayó otros cursos quede na cai.

 Énte esta posibilidad, SUATEA plantegó que’l profesoráu perteneciente a les bolses de profesoráu interín puea tenese en cuenta pa formar parte de les nueves llistes de profesoráu interín. Refugamos la obligatoriedá de presentase a oposiciones pa formar parte de les llistes

d’interinos.

 Propunximos que nes adxudicaciones pa esti cursu nun se penalice al profesoráu que tea en delles llistes pertenecientes a especialidaes del cuerpu de profesores de Primaria d’un llau y de Secundaria, FP y Réxime Especial d’otru, yá que, de nun ser asina, munches personas veránse penalizaes pola adxudicación escalonada de places, n’agosto pa primaria y en setiembre pal restu de cuerpos.

 Plantegóse tamién la necesidá de la regulación de les places a media xornada que previsiblemente abundarán na convocatoria pa esti cursu, regulando claramente l’horariu máximu que correspondería a esti profesoráu.

 SUATEA propunxo la inclusión de la llamada “meyora de puestu” como mecanismu pa garantizar la tresparencia y la igualdá d’oportunidaes pa tol profesoráu interín y como midida pa que les persones con mayor puntuación puean optar a les places que por dicha puntuación-yos correspuenden. Estes y otres propuestes unviaránse a l’Alministración, que abrió un trámite d’audiencia pa que nel plazu de 5 díis s’unvien les alegaciones pertinentes.

 D’otru llau, l’Alministración presentó’l decretu que regula les escueles del primer ciclu d’Educación Infantil (0-3). Esti decretu, yá refugáu en mesa sectorial por SUATEA y el restu d’organizaciones sindicales, supón una oportunidá perdida pa qu’esta educativa s’integre a tolos

 efectos na rede educativa pública y pa que les condiciones llaborales del so personal y l’atención educativa al alumnáu más mozu se garanticen nuna normativa autonómica.

Tamién esta mañana celebróse una reunión del Conseyu Escolar del Principáu onde SUATEA foi la única organización que presentó enmiendes a la regulación de los Centros Integraos de FP, que fueron refugaes pola mayoría del Conseyu.

Secretariáu d’Asturies de SUATEA  29-07-2014