SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
SUATEA queda solu y conviértese nel únicu sindicatu que sigue refugando frontalmente l’alcuerdu d’interinidá.
Na mañana de güei xueves, 9 de febreru, celebróse una Mesa Sectorial de Negociación de Personal Docente p’afaer los coeficientes multiplicadores de los Apartaos II y III A) del actual Alcuerdu d’Interinidá, en vigor dende 2014, a la fase de concursu de les oposiciones d’estabilización.
SUATEA foi la única organización sindical que votó en contra del cambéu por dos motivos:
El primeru débese a que la propuesta de l’Alministración nun modifica nenguna de les clauses poles qu’el nuesu sindicatu refugó l’alcuerdu de 2014, nel qu’estableció la obligatoriedá de presentase a los procesos selectivos cada vez que se convoquen pa poder caltenese nes llistes, cola correspondiente baremación; la imposibilidá d’optar a entrar en llistes d’otres especialidaes si se convoquen el mesmu añu y la llende nos años y nos puntos pola esperiencia docente previa.
El segundu, porque pensamos que ye urxente salvar del paru al profesoráu interino técnico de FP que nun cumple los requisitos de titulación esixíos na convocatoria actual pa ser almitíos nos procesos selectivos. Arriendes d’ello, por cuenta de la clausa cuarta del Alcuerdu d’Interinidá, tampoco van poder formar parte de les llistes d’aspirantes a interinidá resultantes, colo que nun van ser convocaos a partir de setiembre de 2023. Esti asuntu solo lu plantegó SUATEA, pues nun taba presente nel orde del día. Esiximos la necesidá de buscar una solución rápida na llinia d’otros territorios como Cantabria onde se-yos va conceder una moratoria hasta que’l procesu d’integración remate (19/01/26), modificando la orde d’interinidá pa incluyilo nes llistes xunto col profesoráu de Secundaria, pero con un nomamientu nel Cuerpu a Escastar de PTFP. Sicasí, énte la nuesa demanda, la directora xeneral de Personal Docente respondió con evasives, emplegando’l mantra: “lo estamos estudiando”.
Magar al marcáu cambéu de la situación actual y futura del profesoráu interino, xenerada polos mal llamaos “procesos d’estabilización”, l’Alministración, xunto col sofitu del restu de les organizaciones sindicales, sigue parcheando un alcuerdu caducu col que nun va poder garantizar la meyora de les condiciones llaborales d’esti profesoráu.
El Secretariáu de SUATEA
N’Uviéu, a 9 de febreru de 2023
Esta entrada está disponible en: Castellano (Castellanu)
