SUATEA presenta un recursu contra l’ausencia de l’Aula d’Inmersión Llingüística nes Cuenques Mineres

Sama, 22 d’abril de 2025. El sindicatu SUATEA presentó un recursu formal énte la Conseyería d’Educación del Principáu d’Asturies pa esixir la implantación inmediata d’un Aula d’Inmersión Llingüística nes cuenques mineres del Nalón y del Caudal, tal como recueye la normativa vixente.

L’acción diose a conocer esta mañana nuna rueda de prensa celebrada a les puertes del IES Jerónimo González de Sama, na que participó’l delegáu sindical de SUATEA, Fran Rey, acompañáu por profesoráu de la contorna. Rey, profesor n’activu de Física y Química nel IES Cuenca del Nalón, denunció la situación d’abandonu institucional d’una población escolar cada vegada más diversa lingüísticamente, frutu de la medría d’alumnáu migrante que desconoz l’idioma. “Cuando llegué al institutu, solo había un par d’alumnos nesta situación. Güei yá son 14”, esplicó.

Dende’l sindicatu aportunar en qu’esta falta supon xuna doble discriminación: contra l’alumnáu, frayando los derechos d’unu de los sectores más marxinaos de la sociedá, y contra el mesmu territoriu. “¿Por qué se niega a les cuenques mineres un recursu que sí esiste n’otres zones?”, preguntóse Rey.

Amás, dende SUATEA recuérdase que les Cuenques Mineres lleven años sufriendo un procesu de perda de servicios públicos, despoblación y deterioru de la rede educativa mientres se sobrefinancia a la rede concertada. Nesti contestu, la negativa a abrir una Aula d’Inmersión Llingüística refuerza’l sentimientu d’agraviu y abandonu institucional. “Nun tamos falando d’un privilexu, sinón d’un derechu educativu básicu pal alumnáu más vulnerable y una ferramienta indispensable pa garantizar la igualdá d’oportunidaes”, concluyó Rey.

El profesoráu presente esta mañana sollertó, amás, de que l’ausencia d’estos dispositivos de sofitu non solo enzanca’l procesu educativu, sinón que tamién xenera conflictos pola falta de comunicación ente l’alumnáu, una tensión que se tresllada a los barrios y provoca situaciones de estigmatización del estudiantáu migrante. “Ye una cuestión que supera l’ámbitu escolar y acaba afectando a la cohesión social de tola comunidá”, señalaron.

A pesar d’haber aconceyao en delles ocasiones col director xeneral d’Ordenación Educativa pa tratar esta cuestión, SUATEA denuncia que nun recibió respuesta dalguna en más d’un añu. Por ello, el sindicatu alvierte de que va siguir pela vía llegal, llegando a los xulgaos si ye necesario, y alvierte de nueves movilizaciones y un aumentu de la presión social pa llograr que la Conseyería rectifique.