SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Dende SUATEA queremos solidarizanos coles nueses compañeres y los nuesos compañeros mexicanos de Oaxaca que tán desenvolviendo una trabayosa llucha contra la reforma educativa que pretende imponer el gobiernu de Peña Nieto.
Esta reforma presentada n’avientu de 2012, aprobada’l 25 de febreru de 2013 y promulgada el 12 de setiembre del mesmu añu, tien ente les sos principales funciones, la creación d’un serviciu profesional docente col establecimientu del Sistema Nacional d’Evaluación Educativa y la constitución del Institutu Nacional pa la Evaluación de la Educación, que d’últimes, proponen evaluar al profesoráu con un exame estandarizáu pa favorecer el méritu nel ingresu y permanencia nel serviciu profesional docente.
Estos factores son dalgunos de los principales motivos de la protesta. Nun tien d’haber un exame xeneralizáu, yá qu’esisten diverses condiciones de trabayu que faen desigual la educación básica. A esto, súmense sanciones como la perda de la plaza o una reasignación, nel casu de que’l profesoráu nun apruebe la evaluación en tres oportunidaes.
La reforma, supunxo yá’l despidu inxustificáu de miles de maestres y maestros nel país. So la premisa de “alzar la calidá educativa del país”, la reforma educativa impulsada en 2013, plantega la evaluación obligatoria pa que los maestros puedan ingresar y caltenese dientro del sistema educativu.
Les protestes realizaes en defensa de la escuela pública cobraron yá la vida de 13 maestros, hai 25 persones desapaecíes y decenes de feríos. El profesoráu mexicano llogró’l sofitu del pueblu mexicanu al berru de “maestro, aguanta, el pueblo se levanta”.
Dende SUATEA:
– condergamos los métodos represivos emplegaos pol gobiernu d’Enrique Peña Nieto, atacando de forma escomanada a quien realicen protestes pacífiques.
– esiximos que les persones responsables de los asesinatos de los manifestantes y la desapaición nun salgan impunes.
– sofitamos la llucha del profesoráu y del pueblu mexicanos en defensa de la educación pública y gratuita, lo mesmo que de la llibertá d’espresión.
– convocamos a la concentración que se va realizar ante’l consuláu mexicanu, mañana xueves 23, a les 20:00h, na Plaza de la Escandalera d’Uviéu.
Esta entrada está disponible en: Castellano (Castellanu)
