Asturies impón un programa de refuerzu en “lengua” y matemátiques

Asturies impón un programa de refuerzu en “lengua” y matemátiques ensin más enseñantes, nin desdobles nin amenorgamientu de ratios

El pasáu xueves 6 de febreru, en xunta telemática caltenida col director xeneral David Artime, los equipos directivos de 36 centros de Primaria y 25 de Secundaria fueron informaos de que, por cuenta de los sos baxos resultaos nes pruebes de diagnósticu de competencia llingüística y matemática, la Conseyería diba impone-yos la participación nel “Programa de Cooperación Territorial de Refuerzu en Competencia Llectora y Matemática”, impulsáu pol Ministeriu d’Educación. 

Esti programa nun ye más que la concreción d’un anunciu que fixo’l presidente Pedro Sánchez en xineru de 2024 sobre la intención d’esi Ministeriu de destinar unos 500 millones a ameyorar la competencia en “lengua” y matemátiques del alumnáu con peores resultaos en pruebes diagnóstiques. Abluquemos cuando nos enteremos de que la intención de la Conseyería d’Educación nun ye nin reforzar nin contribuyir a que se faigan desdobles pa poder dedicar una atención más personalizada al alumnáu con baxos resultaos. Va contratase profesoráu, sí, pero nun va haber más enseñantes. 

Otra manera, el surrealista plan diseñáu pola Conseyería asturiana ye’l siguiente: va dotase a caúnu d’esos centros con un o una docente más a media xornada (nos colexos, la plaza va tener perfil de Primaria; nos IES, perfil de “lengua” o matemátiques), pero la so función va ser sustituyir al profesoráu titular, que va dedicar estes hores de “lliberación” a participar nuna formación pa contribuyir a qu’el so alumnáu ameyore neses competencies. Dempués, siguiendo’l modelu de “formación en cascada”, estes persones van tener que formar a los sos compañeros/es del claustru, amás d’entrar clase per clase “asesorando” y “aconseyando” sobre metodoloxíes y actividaes que solucionen los problemes señalaos. Dellos equipos directivos plantegaron nesa xunta qué pasaría si nengún profesor o profesora quixera asumir esa xera, a lo cual respondióse que sería l’Equipu Directivu quien tendría d’asumilo, y que, amás, nun habría amenorgamientu horariu si diera esti casu. Tamién recordaron a los equipos directivos que, nel so llabor de llideralgu, sabríen buscar maneres de “convidar” y “arrastrar” al profesoráu a faelo. 

Paeznos pergrave especialmente nel casu de la etapa de Primaria, onde se-yos va quitar a grupos enteros al so tutor/a, que ye la persona de referencia pa too, non solo no académico sinón tamién no emocional. Por si fora poco, esto va acarretar más burocracia pa esi profesoráu “escoyío”, que tendrá d’ellaborar un plan nel qu’analice les causes de los baxos rendimientos y proponga midíes de meyora. 
Dende SUATEA denunciamos la imposición d’esi programa pues, amás de nun cuntar cola opinión de los claustros de los centros, responsabiliza, una vegada más, al profesoráu de les malos resultaos llograos pol alumnáu nes pruebes de diagnósticu. Esiximos que’l dineru público se destine  a contratar más profesionales, de tal manera que puedan amenorgase ratios al traviés de desdobles. El profesoráu tien la formación abondo; lo que precisamos nestos centros que presenten peores resultaos son grupos más pequeños, atención individualizada, y que se doble la inversión n’especialistes n’atención a la diversidá.