Escuela Pública, centros de capacitación dixital y privatización

El 2 d’avientu de 2022, la Conferencia Sectorial d’Educación aprobó la propuesta de distribución y criterios de repartu de los creitos destinaos a la creación d’una Rede de Centros de Capacitación Dixital, nel marcu de la Rede Nacional de Competencies Dixitales, por un importe de 29.505.000 €, dientro del Plan de Recuperación, Transformación y Resiliencia (PRTR). D’ellos p’Asturies  presupuéstense 562.000 €. 

Los oxetivos d’esa capacitación dixital pasen por flexibilizar la formación, pa facela accesible a tola población en cualesquier momentu, y que tola población del Estáu alquiera les capacidaes dixitales que-y permitan interactuar como usuaria independiente con entidaes financieres, alministraciones, organismos y otres entidaes, al tiempu que se complementen estes capacidaes nos sistemes educativu y formativu. El plan va priorizar que pueda llegar a los colectivos más vulnerables.

Nel alcuerdu pa l’aplicación d’esti plan afírmase que’l valor añadíu de l’actuación ta na capacidá de poner al serviciu de la ciudadanía les infraestructures y dotaciones de los centros dependientes de les alministraciones públiques, al traviés de la dedicación d’aules y otros espacios con dotación de serviciu educativu pa les actuaciones de capacitación dixital. La Conseyería d’Educación d’Asturies decidió que van ser los centros d’educación de persones adultes (CEPA) los encargaos d’aplicar esti programa y, polo tanto, pondrán  los sos espacios y recursos a la so disposición. 

Nos compromisos d’aplicación del programa educativu reséñase como valor añadíu poner al serviciu de la ciudadanía infraestructures educatives, dalgo que ye engañoso,  yá  que de fechu  les infraestructures yá esisten y tán al so serviciu nos centros d’adultos, incluso ufiertando programes d’enseñances non formales con conteníos asemeyaos a los propuestos como una gran novedá. La diferencia ye qu’agora hai una partida económica estra cola que meyorar los espacios y los recursos materiales qu’una vez acabáu’l programa quedarán a disposición de los centros educativos. Sicasí, esta inversión va dexar bones ganancies a les empreses tecnolóxiques de hardware y software. Nesti últimu casu  tenemos el precedente de que la Conseyería opta por sistemes operativos y aplicaciones privativos que suponen un gastu munchísimo mayor que los llibres a los que puen optar. 

La implantación del plan supón aceptar el compromisu de contratar a personal xenerando nuevos puestos de trabayu. Considerando que la formación que se va a  impartir nun ye formal, podrá contratase a personal non docente. Ye dicir, ábrese la puerta a la esternalización de servicios educativos, educativos anque nun sean educación formal, y que puen dar llugar a la contratación d’empreses  que pongan el personal y la programación de los conteníos, apañando bones y fáciles ganancies  ensin nenguna inversión en recursos materiales.

Los principios de calidá de la educación y la concepción d’ella como un procesu permanente que se desarrolla a lo llargo tola vida  recoyíos na llei deberíen torgar esa posibilidá d’esternalización de los servicios educativos. Garantizaría estos principios el que la formación en competencia dixital la imparta el personal docente especialista de los centros d’adultos que, como obliga’l plan, tien de ser contratao, xenerando asina nuevos puestos pa personal interino. 

P’acabar, denunciar dende SUATEA la sistemática erosión que ta sufriendo’l sistema educativu públicu al vese gravemente amenazáu :

• Pola esviadura de fondos europeos escontra entidaes privaes disfrazaos de serviciu públicu: una privatización tapecida.  
• Pola  falta de planificación y inversión  educatives que nos faen depender cada vez más de los fondos estraordinarios europeos  colos que dotar de recursos materiales y personales al sistema educativu públicu. 
• Pola imposición de los intereses de los poderes económicos  sobre los  valores educativos que faen que, pasu ente pasu, perdamos la nuestra soberanía de xestión.

El Secretariáu de SUATEA.

N’Uviéu a 22 de xunu de 2023.