28 de xunu. Énte a la Involución, alerta y movilización. Arguyu LGTBI, arguyu cívicu

Esta entrada está disponible en: Castellano (Castellanu)

Los resultaos de les elecciones autonómiques y municipales del pasáu mes de mayu, significaron un importante valtu electoral. Una combinación de factores (división de candidatures, gastadura de fuerces d’esquierda, aumentu de la desmovilización y astención, el sistema electoral qu’impón una torga pa llograr representación…) dio como resultáu que bona parte del poder municipal y autonómicu pase a depender de fuerces polítiques nes que los sos valores son antagónicos a los que defendemos dende’l movimientu lgtbi.

Per primer vegada, vamos hacia un 28 de xunu, Día del Arguyu lgtbi, marcáu por una fuerte amenaza contra los derechos que tantos años mos costó llograr.  Asistimos a nivel internacional a un ascensu de fuerces populistes que cuestionen bona parte de los principios nos que se sofiten les llibertaes y valores democráticos. Esti ascensu tien el so reflexu nel Estáu Español. Vimos nestos últimos años l’afitamientu d’un negacionismu per parte d’estes fuerces, Partíu Popular (PP) y Vox, que cuestionen les meyores na llucha pola igualdá. Recordemos el famosu recursu del PP énte’l Tribunal constitucional en contra del matrimoniu igualitariu. Agora, sumamos los discursos que cuestionen la llucha pola igualdá de les muyeres, el cambéu climáticu, la necesidá de faer una revisión de la memoria democrática realizada nel últimu periodu o planteguen la necesidá d’adoptar midíes contra la inmigración. Pa la derecha y l’estrema derecha, los distintos movimientos sociales apaecen nel horizonte como fuerces sociales a ablayar.

En menos d’un mes vimos como estos partíos repartieron el poder en Conceyos y Gobiernos autónomos y tomaron les primeres midíes que, siempres, van en contra de les propuestes del movimientu lgtbi. Asina, yá s’empezaron a retirar les banderes arcu iris d’edificios públicos, robláronse alcuerdos pa introducir el nefastu pin familiar que cuestiona la necesidá de falar al alumnáu d’aspeutos rellacionaos con temes d’orientación sexual, de xéneru o de memoria histórica. Introduzse la censura y la medrana ente’l profesoráu y avancen la incultura y los prexuicios irracionales. Daqué paecío asocede cola violencia de xéneru, negada especialmente por Vox. Una vegada más vamos tener que recordar que los nuesos derechos formen parte de los Derechos Humanos.

Pa la población lgtbi, como pa cualquier persona demócrata, valores como la igualdá, el respetu a les llibertaes democrátiques, la reconocencia de la diversidá, a nivel social, d’orientación, de xéneru, d’orixe étnicu, son cuestiones fundamentales pa poder caltener un horizonte lliberador, pa poder construyir una sociedá onde tengan cabida toles persones. Güei, esa reconocencia ta baxo una grave amenaza.

Ye por too esto polo que la celebración del Día del Arguyu lgtbi adquier anguaño un significáu especial. Tenemos que salir a la cai pa denunciar estos primeros ataques contra los nuesos colectivos y los principios democráticos. Vimos cómo a nivel mundial impónense fuerces polítiques tóxiques que cuestionen les llibertaes, qu’esparden mentires, que se nieguen a reconocer los resultaos electorales cuando-yos son adversos. Quieren enllantar na nuesa sociedá eses mentires y esos métodos. Yá lo vimos cuando per primer vegada en décades, espublizaron nel nuesu país abarruntes sobre la llimpieza del procesu electoral.

Énte estes amenaces tenemos que movilizanos nes cais. Na Confederación Intersindical (CI) creemos qu’esti Arguyu tien de ser una movilización mayor que nunca pa dar la señal d’alerta énte estes amenaces. Nun tenemos de perder l’allegría de les nueses movilizaciones. Arguyu ye fiesta por vemos y atopamos nes cais. Nun nos van quitar la nuesa allegría. Pero tamién tenemos que caltener viva la memoria de Stonewell, que ye una memoria d’unidá y de llucha.

Igualmente, la convocatoria d’elecciones xenerales pal próximu mes de xunu, debería de ser un momentu nel qu’amosemos la nuesa fuerza allegando a defender los nuesos derechos sofitando a aquelles fuerces polítiques que se pronuncien pola meyora nos derechos democráticos y, coles mesmes, refugar a quien ruempen col consensu social.

Convirtamos otra vegada’l 28 de xunu nel Día del Arguyu de ciudadanía.

Xunu 2023 | Confederación Intersindical

Print Friendly, PDF & Email

Esta entrada está disponible en: Castellano (Castellanu)