SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El sindicatu llanza una campaña pa denunciar la sobrecarga alministrativa que tien qu’aguantar el profesoráu y presentar midíes concretes pa simplificar el trabayu nos centros educativos.
Dende’l Sindicatu Unitariu y Autónomu de Trabayadores de la Enseñanza d’Asturies (SUATEA) punximos en marcha una campaña pa denunciar l’escesu de burocracia que sofita’l profesoráu y reclamar una reorganización de les xeres alministratives que permita dedicar más tiempu a lo que creyemos que ye verdaderamente importante: enseñar.
La campaña básase nel llema «Burocracia con sentíu. Queremos enseñar», y pretende amosar cómo, amás de la so actividá docente, el profesoráu tien d’asumir una cantidá creciente de xestiones alministratives qu’ocupen bona parte de la so xornada llaboral. Al traviés d’un videu divulgativu y d’un informe interactivu ellaboráu pol sindicatu, SUATEA intenta facer visible la dimensión d’esta carga burocrática. La campaña recueye exemplos cotidianos rellacionaos cola xestión d’ausencies, l’atención a la diversidá, les programaciones didáctiques, l’aición tutorial, la convivencia escolar, la organización de los centros o la Formación Profesional, ente otros.
El sindicatu considera qu’esta situación repercute direutamente na calidá de la enseñanza, yá que’l tiempu destináu a cubrir documentos, rexistrar información, ellaborar informes o xestionar procedimientos alministrativos dexa de dedicase a la preparación de les clases, la coordinación ente docentes, l’atención individualizada al alumnáu o’l contautu coles families.
En SUATEA plantegamos una burocracia útil y proporcionada. Ente les propuestes que presenta la campaña destaquen la implantación d’una dixitalización realmente eficaz, la simplificación de les comunicaciones y de los procedimientos alministrativos, la racionalización de la documentación esixida, la unificación de modelos y rexistros, la meyora de la xestión de l’atención a la diversidá, la revisión de les tutoríes de práctiques na Formación Profesional y una organización de la programación, la coordinación y la evaluación afayadiza a la realidá de los centros.
Porque la escuela pública asturiana necesita menos burocracia y más tiempu pa enseñar.
Enlace a la presentación de Genially
Esta entrada está disponible en: Castellano (Castellanu)
