ANPE y UXT aportunen n’estratificar al profesoráu

Ayeri,14 de xineru, fíxose pública la esistencia de negociaciones ente l’Alministración asturiana y los sindicatos ANPE y UXT pa negociar  un segundu Plan d’Evaluación docente. Son yá más de diez años de división sindical nun tema capital como ye lo que toca a les retribuciones del profesoráu asturianu.

En SUATEA denunciemos dende l’empiezu que l’Alministración asturiana, en cuenta de proceder como se fixo n’otros territorios y crear un complementu específicu de calter autonómicu, metiónos per un camín que ye’l que nos llevó a ocupar los postreros puestos en materia retributiva al faer la comparancia estatal. Nesti sentíu, ANPE y UXT xugaron un papel clave al tirar per esi camín que nun ufierta al profesoráu otra salida de meyora salarial  que nun sía sometese a una evaluación que, amás de discriminatoria en comparanza con otres comunidaes autónomes, puede faer depender una parte cada vez mayor del nuesu salariu d’una evaluación practicada poles direcciones de los centros.

Pa ser claros, l’Alministración escoyó  siempres aplicar aquelles fórmules que puedan resulta-y más barates. La introducción d’un segundu Plan d’Evaluación garantiza a la Conseyería  el nun tener qu’enfrenrase a  una xubida llinial ya igual pa tol profesoráu, sinón que la dexa  aplicar a cencielles solo una xubida condicionada (pol tiempu de servicios emprestaos y l a evaluación positiva) nes retribuciones  d’una parte del personal docente. Queriendo consolidar esi camín, dambos sindicatos y la Conseyería d’un Gobiernu supuestamente progresista vuelven sofitar la introducción de práctiques  retributives de calter neolliberal na enseñanza, qu’estratifiquen entá más al profesoráu creando múltiples niveles salariales magar que les xeres realizaes (educar) son asemeyaes y comunes pa tolos/les enseñantes.

La segmentación salarial actual perxudica gravemente al profesoráu porque afonda na división en distintos niveles y enzanca la posibilidá de faer un frente común reivindicativu. Esisten anguaño distintos niveles salariales correspondientes a los distintos cuerpos docentes, a estos añediríense los que crearía’l nuevu Plan d’Evaluación: primeramente dos tramos (al segundu nun podríen aportar les persones de nueva incorporación a les plantiyes por nun cuntar cola antigüedá esixida- más de 10 años-). Esto supondría, según reconocen ANPE Y UGT, la esclusión de non menos de 4000 docentes.

Dende SUATEA venimos aportunando en que la única salida xusta pasa pola homologación salarial col restu de territorios del Estáu. Pa ello sedría necesaria la creación d’un complementu autonómicu qu’afecte a la totalidá del profesoráu: toos/es educamos, toos/es cobramos. Y asina lo reconocen en toles demás comunidaes autónomes. Esi complementu significaría una xubida llinial ya idéntica pa tol profesoráu, independientemente del cuerpu onde empreste’l so serviciu y ensin condicionante dengún.

Somos conscientes de qu’esta solución resultaría más cara pa l’Alministración, pero tamién ye verdá que sedría la única solución xusta,  cuidao que beneficiaría al conxuntu del profesoráu en llugar de solo a una parte del mesmu. Nel sentíu contrariu paez que trabayen y negocien ANPE y UXT.  Quieren consiguir alcuerdos nos qu’ellos sían los causantes y protagonistes de la repartida de dineru ensin importa-yos qu’ello solo beneficie a una parte.    Búscase d’esta miente consolidar vecería electoral de la que faen un favor inestimable a l’Alministración ufiertándose como los axentes llexitimadores de la opción más barata..

El Secretariáu de SUATEA

N’Uviéu a 16 de xineru de 2020