Los STES-I pola consolidación, estabilidá y meyora del profesoráu interino

STEs-i decidió, ente otres midíes, solicitar xunta a la Ministra d’Educación y Formación Profesional y a los partíos que formen gobiernu, al Ministeriu de la Seguridá Social y convocar asamblees informatives.

La Confederación de STEs-i alcuerda doblar esfuerzos y acciones pa dir hacia l’afitamientu, estabilidá y meyora de les condiciones llaborales del profesoráu interín.

Les persones responsables d’Acción Sindical de los sindicatos que formen la Confederación de STES axuntáronse en Madrid p’analizar la situación del profesoráu interín y alcordar acciones p’algamar la estabilidá y l’afitamientu del colectivu, dempués d’analizar los efeutos de les oposiciones masives d’estos años en tolos territorios y constatar les diferencies ente territorios no que cinca a la configuración de les bolses de trabayu, lo mesmo que de les sos condiciones llaborales.

Tamién se trató la situación xurídica nel Tribunal de Xusticia de la Unión Europea. A la espera de la sentencia, analizáronse les conclusiones de l’abogada xeneral, que se valoren positivamente porque sofiten les tesis de STES que cuestiona’l modelu d’oposición como mediu pa solucionar la problemática interina.

De siguío alcordáronse delles acciones pa siguir trabayando pol afitamientu y estabilidá del colectivu y pola meyora de les sos condiciones llaborales. Nesi sentíu alcordóse:

•     Solicitar una entrevista cola Ministra d’Educación y Formación Profesional, Isabel Celaá, pa convocar la Mesa Sectorial y encetar, amás de la derogación de la LOMCE y la meyora de les condiciones llaborales del profesoráu y del sistema educativu, el cambéu del RD d’ingresu a la función pública docente y l’introducción de les víes d’afitamientu recoyíes nel TREBEP, ente otres midíes.

•     Solicitar entrevistes colos partíos que sofiten al gobiernu estatal, colos mesmos temes que la entrevista cola Ministra.

•     Convocar asamblees informatives nos territorios pa tratar estos temes.

•     Solicitar una xunta col nuevu Ministeriu de la Seguridá Social pa que s’equiparen les condiciones de xubilación del profesoráu interino y el funcionariu de carrera a partir de 2011 (Seguridá Social) coles del funcionariáu de carrera anterior a 2011 (Clases Pasives).

Toes estes propuestes treslladáronse pola tarde a la xunta del Secretariáu de STEs, qu’aprobó les midíes alcordaes pola mañana.

Secretariáu de STEs-i | 15 de xineru de 2020