Alcuerdu sobre calendariu OPE.

“Alcuerdu de la Mesa Sectorial de negociación de personal docente sobro calendariu y fixación de determinaos criterios básicos aplicables a los procedimientos selectivos del periodu 2018-2022”

RAZONES POLES QUE SUATEA ROBLÓ ESTI ALCUERDU

Como ye sabío, SUATEA-STEs nun firmemos l’Alcuerdu pa la Meyora del Empléu Públicu” de 29 de marzu robláu en Madrid, con calter estatal, ente’l gobiernu y delles organizaciones sindicales. Yá esplicamos nel so momentu que compartimos l’oxetivu d’amenorgar l’alta tasa d’interinidá docente (25% nel Estáu, 31% n’Asturies) al 8%, pero que dichu alcuerdu ye inasumible porque puede significar un auténticu ERE nel sector, al consolidar plantiyes, pero non al personal docente qu’ocupa interinamente eses places. Situación que s’acentúa n’Asturies debío al actual Alcuerdu de profesoráu interino que venceya les llistes d’aspirantes a la nota de les oposiciones.

Tamién ye conocida la nuesa propuesta a favor d’un procesu estraordinariu que sirva pa consolidar l’empléu de les persones que lleven años trabayando como personal funcionariu interino. Magar que tanto l’alministración como delles organizaciones sindicales dicen qu’esto nun ye posible por frayar preceptos llegales sancionaos pol Tribunal Constitucional, llegando dalgunos a acusamos de mentir al profesoráu interino, siguimos pensando que esa propuesta serdía perfectamente llegal, si hubiera voluntá política, en base al artículu 61.6 del Estatutu Básicu del Emplegáu Públicu que diz textualmente:

“Los sistemes selectivos de funcionarios de carrera van ser los d’oposición y concurso-oposición que tendrán d’incluyir, en tou casu, una o delles pruebes pa determinar la capacidá de los aspirantes y establecer l’orde de prelación.

Namás en virtú de llei va poder aplicase, con calter escepcional, el sistema de concursu que va consistir namás na valoración de los méritos”

Queda claro nel segundu párrafu del artículu que la nuesa propuesta tien encaxe llegal a condición de que s’apruebe una llei (decisión política) y de que se dea una circunstancia escepcional. Al nuesu entender, les tases d’interinidá antes mentaes suponen una escepcionalidá y xustificaríen l’aplicación del citáu artículu.

Énte la negativa de l’alministración a aceptar la nuesa propuesta llegamos a un alcuerdu de mínimos con toles organizaciones presentes na Mesa Sectorial, sacante una, tanto en Madrid como n’Asturies, tendente a embrivir los efectos negativos derivaos del alcuerdu de 29 de marzu. El más importante, el que les pruebes nun sían eliminatories; cuestión ésta tamién refugada pol MECD.

Ye nesti contestu nel que la Conseyería d’Educación d’Asturies propunxo güei la firma d’un alcuerdu en Mesa Sectorial que nes sos clauses recueye aspeutos sobro calendariu y fixación de determinaos criterios básicos aplicables a los procedimientos selectivos del periodu 2018-2022 (básicamente, coordinación con otres CCAA y calendariu de convocatories de los distintos cuerpos a convocar cada añu). Magar qu’esti alcuerdu remite nel so preámbulu (parte espositiva, non normativa) al precitáu alcuerdu de 29 de marzu, non compartíu por SUATEA poles razones espuestes, decidimos subscribilu na so parte normativa (distintes clauses que lu componen y por tantu d’obligáu cumplimientu) pa poder facer siguimientu exhaustivu de caúna d’elles. Nun lo roblar  significaría nun tar presentes nes Meses Sectoriales nes que se va concretar la execución de les ufiertes d’empléu públicu docente n’Asturies nos próximos cinco años y, polo tanto, la imposibilidá de defender al profesoráu interino na llínea cola nuesa acción sindical desenvuelta a lo llargo de munchos años.

https://suatea.org/wp-content/uploads/2017-12-AcuerdoMesasectorial-oposiciones_-2018_2022.pdf

Uviéu, 21 d’avientu de 2017