Previsión de plantiyes pal cursu 2018- 2019

Previsión de plantiyes pal cursu 2018- 2019: Nada nuevo nel horizonte

Coincidiendo col períodu de vacaciones, la Conseyería d’Educación treslladó a los centros educativos públicos de Primaria y Secundaria les previsiones de plantiyes pal próximu cursu 1018-2019.

Llámanos l’atención qu’estos datos se fixeren públicos a los centros en víesperes de vacaciones, mientres que se abría un períodu d’allegaciones a eses previsiones que finaba güei martes, 9 de xineru. Nun entendemos cuál ye’l propósitu de la Conseyería al plantegar unos plazos que nun son los más afayadizos pa trabayar dende los centros.

Por otru llau, hai que señalar que, hasta’l día de güei, nun se nos facilitó l’accesu a los datos globales pal conxuntu de los centros yá que nun se fixeren públicos por parte de la Conseyería. La resultancia d’esta decisión ye que nun pudimos facer un analís pormenorizáu de los mesmos.  Cola primera impresión del conxuntu de cifres podemos llegar a unes conclusiones que vamos tener de confirmar con un estudiu más pormenorizáu.

Dende un puntu de vista cuantitativu, puede afirmase que se destrúin puestos en Primaria ya Infantil mientres que se creen otros nos diversos cuerpos de Secundaria. Los nuevos puestos apaecen nos grandes núcleos urbanos y rellacionaos, en dellos casos, con especialidaes de ciclos formativos, lo que dexa un balance dalgo positivu pero que nun compensa, n’absolutu, les perdes de puestos de trabayu sufiertes en cursos anteriores.

Llamentamos confirmar que la Conseyería nun tien previstu nengún plan pa revertir les hores lectives impuestes al profesoráu col pretestu de la crisis económica. Esta propuesta de plantiya pal próximu cursu, augura que vamos siguir cola actual saturación d’hores que torga’l trabayu del personal docente llastrando les posibilidaes d’ufiertar la enseñanza de calidá que correspondería a un país avanzáu y desenvueltu.

Vemos con esmolición qu’en diversos centros suprimiéronse places rellacionaes colos llamaos ámbitos o sofitos rellacionaos cola atención a la diversidá, qu’ayuden  al alumnáu con mayores dificultaes p’algamar les competencies esixíes pola llei. Tratase d’una midida que topeta directamente  col envís d’amenorgar los niveles de fracasu y abandonu escolar. Namás vamos poder algamar esi oxetivu curiando al alumnáu en riesgu de fracasu y abandonu. Suprimir o amortizar places d’ámbitos significa poner una torga más pal desenvolvimientu d’esa enseñanza pública de calidá a la qu’aspiramos.

Otru datu significativu qu’apaez ye la medría de places rellacionaes col programa billingüe na especialidá de Primaria y tamién la conversión, en Secundaria, de places ordinaries que pasen a ser billingües, un fechu que va xenerar problemes nel funcionamientu de los Departamentos didácticos afectaos nos centros.

Si hubiera que caracterizar estes previsiones tendríemos que falar de continuidá ya inmovilismu. Los problemes que tien plantegaos el sector educativu nun se van resolver si nun hai cambeos significativos na plantiya de docentes.

Uviéu, 9 de xineru de 2018