22 de xunu, Día de la Enseñanza Non Sexista

Reivindicamos güei, el Día de la Enseñanza Non Sexista, el derechu a una enseñanza democrática,
inclusiva y llibre d’estereotipos o sesgos de xéneru. Como Organización de Mujeres queremos reafitar el nuesu compromisu cola defensa de la educación non sexista esponiendo datos actuales a nivel mundial y, primero de too, denunciando la situación de les neñes y muyeres n’Afganistán.

Por increíble que paeza, la entruga ¿Sigue la educación en plenu sieglu XXI siendo sexista?, ye más
pertinente que nunca; a los fechos nos remitimos:

• Dos tercios de la población femenina mundial nun ta escolarizada, fechu que sienta la base pola que más de 1000 millones de muyeres nel mundu nun tienen accesu a un trabayu dignu viéndose seriamente amenaciada la so independencia económica.
• Anque se ta avanzando, el lexítimu papel que la muyer tuvo na hestoria y la cultura sigue siendo ignoráu, denostáu y infrarrepresentáu nos llibros polo xeneral y nos llibros de testu en particular.
• Diversos organismos como la Organización de les Naciones Xuníes pa la Educación, la Ciencia y la Cultura (UNESCO) alvierten que los estereotipos de xéneru siguen llindando les trayectories educativu y profesional de neñes y muyeres, especialmente n’árees científiques, tecnolóxiques y de lideralgu.
• ONU Muyeres alvierte sobro l’impactu de la violencia y la discriminación de xéneru nos espacios educativos, afectando’l bienestar, la permanencia y el desenvolvimientu integral d’estudiantes y trabayadores de la educación.
• Inalmitiblemente, Afganistán convirtióse nel únicu país del mundu onde se prohibe puramente la educación secundaria y superior pa neñes y muyeres. En 2021 los talibanes prohibieron a les neñes mayores de 12 años llegar a la escuela secundaria, en 2022 prohibieron a les muyeres asistir a la universidá. La población femenina lleva cinco años ensin poder aportar a la educación secundaria y cuatro años ensin poder aportar a la universidá, lo que representa una violación esplícita de los derechos humanos y una clara vulneración de la llibertá de la muyer que nun podemos permitir.
• 1,4 millones de muyeres afganes (UNESCO) fueron deliberadamente escluyíes del sistema educativu y les que persisten n’aportar a la educación xueguen la vida nello. Profesores, madres
  y alumnes arriesguen lliteralmente les sos vides asistiendo furtivamente a escueles clandestines nun país que dende 2021 dictó 120 lleis en contra de les muyeres: dende permitir atrocidaes como llegalizar el matrimoniu con neñes de 7 años hasta eliminar claramente tou tipu de llibertaes. Si yes muyer n’Afganistán nun puedes amosar la to cara, nun puedes mirar directamente a los homes a los güeyos, nin mirar peles ventanes que tán siendo tapiaes, nun puedes salir a la cai llibremente, nun puedes estudiar nin trabayar y tampoco puedes espresate llibremente en públicu nin participar na sociedá o la política.
• El 80% de les muyeres foi espulsada del mercáu llaboral y vieron llendáu’l so accesu a l’atención
  sanitaria, con consecuencies nefastes pa la so salú, derechos sexuales y reproductivos. Dao que namás pueden ser atendíes por doctores (carrera que tienen prohibíu estudiar), esiste un riesgu real de que se produzan muertes evitables. La protección xurídica pa les muyeres relluma pola so ausencia nun país que ta normalizando la violencia de xéneru y onde esiste un aumentu significativu de la violencia conxugal y intrafamiliar. Esti entornu asfixiante ta repercutiendo na salú mental de muyeres y neñes, con alertes xeneralizaes de depresión y suicidiu sobremanera na población adolescente.

Estos fechos constitúin una forma de represión brutal, cruel ya inhumana que non solo supón un arcaicismu en plenu sieglu XXI sinón tamién un retrocesu espeluznante ya inadmitible en tema d’igualdá y derechos humanos.

Facemos un llamamientu urxente a l’acción apellando a la comunidá internacional y solicitando a les autoridaes de facto que se respeten y restablezan los derechos humanos darréu, atayando de raíz espresiones de desigualdaes estructurales que requieren respuestes institucionales clares ya inmediates.

Como organización sindical, abogamos pol poder tresformador de la educación non sexista, cimientu sobro’l cual edifícase una sociedá xusta onde les desigualdaes de xéneru nun tengan cabida. Reafitámonos nel convencimientu de que’l sistema educativu ye’l motor más potente pal cambéu social y la construcción d’un mundu verdaderamente igualitariu. La escuela non solo tresmite conocimientu, sinón qu’exercita’l pensamientu críticu, educa en valores y fortalez les estructures de la nuesa sociedá.

El cambéu empieza nes aules, pero’l so impactu redefine’l futuru de tola humanidá, porque la educación non sexista ye una ferramienta de xusticia social.