DÍA INTERNACIONAL D’ACCIÓN POLA SALÚ DE LES MUYERES

LA NUESTRA SALÚ NUN YE SECUNDARIA: POL FIN DEL SESGU ANDROCÉNTRICU Y LA VIOLENCIA OBSTÉTRICA

Dende la Organización de Muyeres de la Confederación Intersindical, organización feminista, alzamos la nuestra voz esti 28 de mayu para denunciar una realidá silenciosa pero devastadora: el sistema sanitariu sigue ignorando, invisibilizando y maltratando la salú de más de la metá de la población.

La medicina moderna construyóse sobro un modelu androcéntricu onde’l varón ye l’estándar universal. Esta falta de perspectiva de xéneru nun ye solo un erru académicu; ye xuna neglixencia institucional que cuesta vides y cronifica’l sufrimientu de les muyeres.

1.La brecha de datos: un diagnósticu ciegu al xéneru

La investigación médica escluyó históricamente a les muyeres de los ensayos clínicos cola escusa de que les nuestres “fluctuaciones hormonales” complicaben los resultaos. Esto xeneró una llaguna de conocencia peligrosa:

• Enfermedaes cardiovasculares: según l’Institutu Nacional d’Estadística (INE), les enfermedaes del sistema circulatoriu son la primer causa de muerte en muyeres n’España. Sicasí, los síntomes d’un infartu en muyeres (estomagaes, fatiga, dolor abdominal) davezu nun se reconocen porque’l protocolu estándar básase nel patrón masculín (dolor en brazu esquierdu).
• Investigación insuficiente: patoloxíes que nos afecten mayoritariamente, como la endometriosis (qu’afecta a 1 de cada 10 muyeres, unos 2 millones n’España según el Ministeriu de Sanidá), sufren un retrasu mediu nel diagnósticu de 8 a 10 años por cuenta de la normalización del dolor femenín.
• Salú mental: la Encuesta Nacional de Salú revela que la prevalencia de cuadros depresivos ye’l doble en muyeres que n’homes. Sicasí, la respuesta del sistema suel ser la sobremedicación con sicofármacos en llugar d’encarar les causes estructural y social d’esti malestar.

2. Violencia obstétrica: una delda pendiente

Ye inalmitible qu’en plenu sieglu XXI l’atención a la salú reproductiva siga marcada por práctiques paternalistes y intervenciones innecesaries. La ONU yá encamentó a España en repitíes ocasiones a tomar midíes contra la violencia obstétrica, qu’inclúi dende la falta de consentimientu informáu hasta práctiques como la maniobra de Kristeller o episiotomías sistemátiques.

La maternidá, la fertilidá y la menopausia nun son enfermedaes, son procesos vitales que merecen una atención digna, humanizada y basada na evidencia científica actual, non na inercia d’un sistema que nos quita la nuestra autonomía.

3. Les nuestres reivindicaciones                                 

Por too ello, la Organización de Mujeres de la CI esixe de forma inmediata:

• Inversión real y específica n’investigación d’enfermedaes qu’afecten predominantemente a les muyeres, garantizando que’l sexu y el xéneru sían variables obligatories en tolos ensayos clínicos.
• Formación obligatoria con perspectiva de xéneru pa tol personal sanitariu, pa erradicar los sesgos qu’infravaloren el dolor femenín y los síntomes específicos de les patoloxíes en muyeres.
• Protocolos estrictos contra la violencia obstétrica y fomentu d’una asistencia al partu y postpartu respetuosa, garantizando la salú físico y sicolóxico de la madre y la criatura.
• Meyora de la calidá asistencial na menopausia y salú reproductiva, esaniciando l’estigma y dotando de recursos a les unidaes d’atención primaria.
• Educación afeutivu-sexual integral nes aules, pa que les nuestres alumnes conozan los sos cuerpos y los sos derechos, y los nuesos alumnos apriendan que la salú ye una cuestión d’igualdá.

Nun pidimos privilexos, esiximos xusticia sanitaria. El dañu invisible que se fixo a nuesa salú pol simple fechu de ser muyeres tien de cesar. Por una sanidá pública que nos vea, nos escuche y nos curie de verdá.

¡POL DERECHU A UNA SALÚ DIGNA Y CON PERSPECTIVA DE XÉNERU!

Elvira Sánchez Castillo,

Área de Muyer de SATE-STEs Melilla

mayu de 2026