Asturianu: grave problema de planificación educativa ensin iguar

Esta entrada está disponible en: Castellano (Castellanu)

Les axudicaciones de profesoráu interín de güei, 31 de xineru de 2019, faen rescamplar un grave problema de planificación eductativa no que cinca a la enseñanza del asturianu nel cuerpu de profesoráu de Secundaria: siguen ensin cubrise dende primeros de cursu dos places, una nel CPEB Zarréu (Degaña) y otra nel IES “Carmen y Severo Ochoa” de L.luarca. Poro, un carretáu d’alumnáu qu’escoyó recibir esta materia ve conculcáu’l so llexítimu derechu como consecuencia de una falta planificación alministrativa.

Magar qu’esisten llistes y bolses con profesoráu d’esta especialidá (la última bolsa acaba constituíse con diez persones), les places nun son escoyíes.  Ello débese a que les persones que les constitúin yá tán trabayando per otres especialidaes, tienen perspetiva de garrar places más cerca casa (el 80% la población asturiana concéntrase nel centru d’Asturies y polo tanto col profesoráu pasa lo mesmo) o, fundamentalmente, porque les places ufiertaes son a media xornada amás de tar lloñe de la so residencia. Esto último trai como consecuencia unos gastos de tresporte, manutención y residencia que malpenes se son a pagar col sueldu recibíu.

Amás, el profesoráu de Secundaria que nun tien el Grau de Filoloxía con Minor en Llingua Asturiana, pa poder dar clas d’Asturianu tien de cursar el Máster universitariu en Formación del Profesoráu d’ESO, Bachilleratu y Formación Profesional, y elixir les asignatures de llingua asturiana. Anguaño, cada añu solo salen 5 places d’esti Máster, lo que torga enforma l’habilitación de más profesoráu.

Toa esta riestra de factores que torguen que se cubran los puestos de Llingua Asturiana son bien conocíos pola Conseyería Educación. De la non cobertura de places hai antecedentes de cursos pasaos y síguese na mesma dinámica ensin tomar les midíes afayadices. Dende SUATEA proponemos:

  • Aumentar les places del Máster p’afayales a les necesidaes de cobertura places de porfesoráu de Llingua Asturiana.
  • Potenciar el Minor de Filoloxía y la Mención nel Grau de Mestros.
  • Reconocer la especialidá de Llingua Asturiana y Gallego-Asturianu, convocar oposiciones y cubrir les places con funcionarios de Carrera.
  • Planificar les necesidaes educatives de les zones rurales d’esta asignatura y otres en toles especialidaes pa que les places seyan a xornada completa.
  • Ufiertar estabilidá a tol profesoráu interino de los centros rurales con contratos de llarga duración, lo que valdría pa tener plantiyes estables nesos centros.

El Secretariáu de SUATEA

Uviéu, 31 de febreru de 2019

Print Friendly, PDF & Email

Esta entrada está disponible en: Castellano (Castellanu)