6 de febreru. Día Internacional contra la mutilación xenital femenina

6 de FEBRERU. DÍA INTERNACIONAL DE TOLERANCIA CERO COLA MUTILACIÓN XENITAL FEMENINA (MGF)

Probablemente, una de les manifestaciones de violencia de xéneru a la que menos se tien en cuenta sía la de la mutilación xenital femenina, una práctica dañible – rellacionada col matrimoniu infantil, precoz y forzáu- que traumatiza, perxudica y mata a millones de neñes en tol mundu. Considérase una violación de los derechos humanos.

Ello ye que les cifres respíguen: n’África 55 millones de neñes menores de 15 años fueron sometíes a l’ablación o tán en riesgu de selo por cuenta de que los sos gobiernos nun apliquen lleis que la prohiban a pesar de que tea condergada internacionalmente. Pero esti problema nun asocede namás n’África. La MXF súfrenla 200 millones de muyeres y neñes en tol mundu. Nel nuesu mundu globalizáu les persones migren y con elles la so cultura y tradiciones. Desgraciadamente, esta práctica convirtióse en global, practicándose davezu n’América Llatina, Asia Sudoriental y en delles zones d’Oriente Mediu, y agora tamién llegó a los Estaos Xuníos y al Reinu Xuníu.

Les razones poles que se realiza esta práctica son culturales más que relixoses: piensen qu’esaniciar el texíu de cualesquier parte de los xenitales femeninos protexe la virxinidá de les muyeres afectaes, garantizando la so fidelidá. Según la ONU, el factor que más inflúi pa qu’esta violencia persista ye’l deséu de llograr aceptación social y evitar l’estigma social.

Apocayá, la muerte d’una neña de 10 años  por causa de esta práctica en Sierra Lleona acentuó los llamamientos pa la illegalización de l’ablación, consiguiendo que va pocos díes  se prohibiera nesti país que tien una de les mayores tases de MXF n’África.

Tenemos de consiguir qu’esti problema siga siendo una de les prioridaes de l’axenda de los derechos humanos. Diversos organismos internacionales, influyentes testimonios personales, activistes…tán concenciando a les comunidaes locales de lo que ta en xuegu. En 2016 Naciones Xuníes encetó esti tema como una prioridá ente los Oxetivos de Desarrollu Sostenible marcándose como referencia l’añu 2030 p’acabar con esta práctica.

La Organización de Muyeres de la Confederación Intersindical llucha contra tou tipu de discriminación y agresión contra les muyeres y na defensa de los sos derechos y por eso güei, 6 de Febreru, Día Internacional de Tolerancia Cero cola MF, quier unise a toles voces que reivindiquen la so abolición total.

Madrid, 6 de febreru de 2019

Organización de mujer

Confederación Intersindical