23 de setiembre: Día Internacional contra la Esplotación Sexual y Trata de Persones

Esti 23 de setiembre, por cuenta de la celebración del Día Internacional contra la Esplotación Sexual y Trata de Persones, denunciamos esta esclavitú histórica que se cebó especialmente en muyeres y neñes. A nivel mundial, xube a 1,8 millones de persones les víctimes de compraventa y esplotación, siendo mayoritaria la trata con fines sexuales de les que 9 de cada 10 son muyeres y neñes.

En 2020, per primer vegada, menguó’l númberu de víctimes detectaes en tol mundu, lo que nos fala d’una menor capacidá institucional para detectar a les víctimes y del desplazamientu de delles formes de trata escontra allugamientos más ocultos. Del últimu informe de Trata de Persones 2020, ellaboráu pola Oficina de les Naciones Xuníes contra la Droga y el Delitu (UNODC) espréndese que la mayoría de les víctimes de trata que consiguen escapar, faelo polos sos propios medios, son “autu rescataes”: hai más casos de víctimes qu’escapen y denuncien a les autoridaes por iniciativa propia (41%) que casos nos que les víctimes fueron alcontraes poles autoridaes (28%), miembros de la comunidá y la sociedá civil (11%). Esto ye especialmente alarmante si tenemos en cuenta que munches víctimes pueden nun identificase como tales o tarrecen demasiáu a los sos esplotadores como pa intentar escapar.

Dichu informe constata tamién que son les muyeres y les neñes les más perxudicaes en conflictos bélicos, catástrofes naturales o éxodos migratorios. Asina, la guerra n’Ucrania ta alzando los riesgos de trata pa la población movida. Y ye, dende los puntos más conflictivos anguaño, África y Mediu Oriente, d’onde procede la mayoría de les víctimes.

El cambéu climáticu actual multiplica coles mesmes los riesgos d’esplotación. En 2021, 23,7 millones de persones viéronse movíes internamente por catástrofes naturales inducíes pol clima ente que munches otres cruciaron fronteres pa escapar de la probitú. Munches vegaes, la condición de persones migrantes y la discriminación racial súmase al fechu de ser muyer añediendo grilletes a la so esclavitú.

España ye un de los principales países de destín y tránsitu de víctimes de trata n’Europa. Les cifres de consumu de prostitución desvelen qu’un terciu de los homes reconocen haber pagáu dineru por caltener relaciones, según el CIS. Y cada vez son más nuevos los que perpetúen esti sistema de compraventa de persones, según l’Informe Mocedá n’España 2020, el 10,6% de los mozos d’ente 15 y 29 años reconoz pagar por sexu.

Anguaño, la capacidá camaleónica de la esplotación sexual muta a nueves maneres de consumu de persones como recueye la periodista Ana Martín Plaza en RTVE “Internet favoreció tamién nueves formes de prostitución y dexó la esistencia de foros onde los homes que paguen por sexu comenten y puntúen a les muyeres prostituyíes o’l local onde exercen”

La llucha feminista contra esti pactu históricu d’homes que esclavicen muyeres recibió’l pasáu 14 de setiembre un sofitu ensin precedentes per parte del Parlamentu Européu, al aprobar el Informe sobro la regulación de la prostitución na Unión: repercusiones transfronterices y consecuencies na igualdá de xéneru y los derechos de les muyeres  que, per un sitiu, reconoz la prostitución como un sistema entamáu con fines codalosos, un sistema intrínsecamente violentu, discriminatoriu y fondamente inhumanu que funciona como un negociu y crea un mercáu, nel que los proxenetes planien y actúen p’asegurar y aumentar los sos mercaos y nel que los compradores de sexu desempeñen un papel fundamental pa incentivalos. Esto ye, una violencia estructural a la que les muyeres tán espuestes de forma desproporcionada.
Coles mesmes, dichu informe pide un enfoque a escala de la Unión basáu nel modelu nórdicu d’igualdá pa utilizar de forma definitiva tolos preseos prometedores que demostraron la so eficacia p’amenorgar la trata de persones con fines d’esplotación sexual; esixe la introducción de polítiques eficientes qu’esanicien la probitú y ameyoren la protección social, desanicien el fracasu escolar, promuevan la educación, incluyida la educación sobro sexualidá y relaciones, y l’igualdá d’oportunidaes y de tratu, y l’establecimientu de polítiques inclusives que fomenten l’empoderamientu y la independencia económica de les muyeres, xuntu con midíes que conderguen a quien les esploten.
Dende la Organización de Muyeres celebramos l’aprobación d’esti informe y vamos siguir lluchando pol cumplimientu a les midíes propuestes.