Los centros queden ensín conexón

Esta entrada está disponible en: Castellano (Castellanu)

Los centros educativos asturianos lleven una selmana con problemas d’accesu a Internet que-yos torguen trabayar

Fallos na rede facilitada pola Conseyera d’Educación pal accesu a Internet torguen el normal funcionamientu docente nos centros educativos d’Asturies a lo llargu d’esta primera selmana de cursu. Non solo ta viéndose afeutada la rede d’usu xeneral pal profesoráu, sinón tamién la rede alministrativa que se-yos facilita a los equipos direutivos pa les numberoses xestiones que tienen que facer a diario. Too esto traduzse en que’l funcionamientu normal de los centros ta siendo bien difícil, o incluso imposible en dalgunos casos.

Son yá casi 100 los centros educativos que comunicaron a SUATEA que la cayida de la rede torga o direutamente impidi’l funcionamientu normal de los mesmos. Xeres de tolos díes como l’accesu a materiales didáuticos,  la impresión de los mesmos, o el desenvolvimientu normal de les clases tan viéndose impidíos por esta cayida. Tenemos constancia de que son munchos los docentes que tán teniendo que facer usu de la so propia rede de datos móviles, ye dicir, del so bolsu, pa poder proyeutar vídeos al  so  alumnáu, usar recursos TIC, o, simplemente, comunicase con compañeros o con otros centros. 

Tenemos tamién constancia de que dalgunos Colexos Rurales Agrupados (CRAs) tán direutamente paralizaos por esta situación, que dura, en dalgún casu, dende principios de mes. Varios equipos direutivos d’estos centros pusiéronse en contautu con SUATEA pa comunicar que se sienten ninguneaos y abandonaos tanto pola alministración educativa asturiana como pol so Centru de Xestión de Servicios Informáticos (CGSI, poles siegles en castellán), quiene repetidamente-yos comuniquen que solucionaron problemes que siguen presentes. 

Dende los Centros d’Educación pa Persones Adultes tresllándemos que tán afectaes xeres alministratives tan importantes como, por exemplu, la matriculación del alumnáu, que n’esti tipu de centros ta llevándose a cabu estos díes.

En cuanto a la Formación Profesional, el pasáu miércoles entamaben les sos enseñances, y na so sesión inaugural nun se pudo disponer d’accesu a Internet, lo que imposibilita un entamu normal de les clases en varies rames profesionales.

Si bien sabemos qu’estos problemes pueden esistir, nun ye presentable introducir una estratexa de dixitalización ensin disponer de la infraestructura básica de coneutividá necesaria pa desenvolver dichos procesos. Esperamos que d’aquí a final de cursu s’establezca como prioridá dotar a los centros de los recursos necesarios tanto pa la corrección d’estos problemes de base como pa una solución de problemes más rápida y efectiva, que nun los condene a tener que tar díes o selmanes enteres ensin poder funcionar correutamente.

Print Friendly, PDF & Email

Esta entrada está disponible en: Castellano (Castellanu)