21 de febreru, Día Internacional de la Llingua Materna

21 de febreru: Día  la Llingua Materna

Cada 21 de febreru celebramos el Día Internacional de la Llingua Materna. La idea de celebrar esti día fue una iniciativa de Bangladesh. Aprobóse na Conferencia Xeneral de la UNESCO de 1999 y festéxase en tol mundu dende l’añu 2000.

Ye un día especial pa les persones que falamos asturianu o gallego-asturianu, pues faimos reflexonar y tomar conciencia de la importancia que tien caltener vives les nuestes llingües  maternes pa la sobrevivencia la nuestra identidá personal y social como asturinanos/es que mos integramos en condiciones d’igualdá nun mundu diversu, multillingüe y multicultural. Estes dos llingües tán reconocíes  anguaño como minorizaes y en peligru d’esaniciu. Sobreviven milagrosamente nun mundu onde la globalización dile pasu ente pasu les identidaes culturales minoritaries. La glotofaxa avanza nesti contestu  favoratible provocando  un llingüicidiu universal onde  les cultures con llingües dominantes por motivos económicos, históricos y  sociopolíticos, provoquen, de forma intencionada o inconscientemente, l’esaniciu d’otres coles que conviven. Según la UNESCO, polo menos el 43% de las 6000 llingües que s’estima que se falen en mundu tán en peligru esaniciu. Solo unos cientos d’idiomes tán presentes nos sistemes educativos y tienen accesu al dominiu públicu al traviés de los medios de comunicación. Paradóxicamente pal mundu globalizáu onde vivimos,  menos d’un cientu de llingües s’empleguen nel universu  dixital. Cada vez que s’esanicia una llingua piérdese una visión particular del mundu, formes  particulares de pensar, recuerdos, tradiciones, espresiones, fontes de recursos d’aprendizaxe colos que resolver problemes futuros.

Les sociedaes multiculturales y plurillingües son una realidá cola que convivimos tolos díes nos nuestros pueblos, barrios, comunidaes o estaos. El respetu hacia la diversidá, la convivencia en paz de les persones, los pueblos y cultures son valores básicos de les sociedaes desarrollaes. Poro, l’usu de les nuestres llingües maternes na Educación con un enfoque plurillingüe y en condiciones d’igualdá curricular coles anguaño mayoritaries (inglés y castellán) ye un axioma y base d’una educación de calidá que respeta los derechos llingüísticos de los/les asturnianos/es. Constitúi esti enfoque plurillingüe y multicultural de la educación un finxu hacia’l que caminamos, pero del que mos queda muncho por percorrer p’algamalu.

Reconocer y promover les llingües maternes contribúi a construir un futuru ensin marxinación de persones, cultures, pueblos o sociedaes, un mundu más xustu, pacíficu y sostenible.