Rempuesta de SUATEA al Arzobispu d’Uviéu

Respuesta de SUATEA al Arzobispu d’Uviéu

El desenvolvimientu parlamentariu de la nueva Llei educativa, la LOMLOE, llamada a rectificar los desequilibrios introducíos pola llei Wert sigue’l so percorríu en metá de la pandemia. Nestes dos últimes selmanes, les protestes que tienen el so orixe nos sectores conservadores y relixosos rescamplen y tuvieron della sonadía nos medios de comunicación. Nesa mesma llínea, la carta pastoral del Arzobispu d’Uviéu vien actualizar los vieyos argumentos, que s’anueven cíclicamente, cada vez qu’una llei educativa entra nel calendariu lexislativu y tenemos que recordar que son delles yá les lleis que conocimos desque se produció’l restablecimientu de les llibertaes.

Dende SUATEA fiximos pública la nuesa posición milenta vegaes. La esistencia d’una rede educativa paralela, la escuela concertada, ye una anomalía que tien el so orixe nos alcuerdos roblaos pol réxime franquista y el Vaticanu. La política del consensu y otres necesidaes del momentu, hai yá cuarenta años, dieron orixe a esa situación a la que, tarde o aína, va haber que encariar pa normalizar un fechu difícilmente xustificable.

Fala l’arzobispu de dellos temes, pero lo que nos paez más llamativo y sustancial ye’l referíu a la llibertá. Vivimos una dómina na que’l populismu de dereches aportuna n’arrampuñar banderes ya idees que fueron patrimoniu de la esquierda.

Entemeciendo temes y enllamorgando el campu de xuegu, fala de la llibertá ideolóxica, denunciando que’l gobiernu aspira a enllantar un sistema d’adoctrinamientu. Que sía esti tema, l’adoctrinamientu, el que valga como base de la denuncia nun dexa de ser sorprendente y engañoso viniendo d’onde vien, de les files de quien lleguen milenios adoctrinando y escluyendo a quien nun piensen igual. Por suerte, el sistema constitucional establez unes llibertaes democrátiques de pensamientu, xunta, espresión, etc. y unes canales pa la so defensa que torguen esi adoctrinamientu del que nos fala. Choca que reivindique una llibertá que tien como oxetivu poder siguir adoctrinando en temes que güei van en contra de la Constitución como la lgtbfobia o la separación d’alumnáu por sexos.

Taría meyor que’l Sr Arzobispu falara de la llibre iniciativa económica para desplicar el negociu que supón la rede concertada de centros educativos. Si, a los datos numbéricos qu’ufierta na so carta, amiesta los correspondientes a los ingresos que xeneren, entiéndese meyor la so defensa cabezona d’una rede paralela que produz beneficios económicos y, coles mesmes, dexa caltener importantes parceles de poder ideolóxicu y políticu.

Solo por ufiertar unos datos, la cuestión de les mal llamaes “cuotes voluntaries” de los centros concertaos, que son obligatories y bazcuyen dende 50 a 120 € mensuales. Podemos multiplicar esa cantidá pol númberu d’alumnos y alumnes que cita l’Arzobispu pa faenos idea de los beneficios llograos. Otru datu, a considerar ye’l referíu al importe del profesoráu de Relixón na Escuela Pública que pasa de 4.900 millones d’euros, en tol Estáu. Convien recordar qu’esi profesoráu ye escoyíu pola so “comunión ideolóxica”.

N’España nun apeligra la llibertá de creencia, nin la llibertá pa escoyer centru educativu. Esa llibertá yá esiste. Lo que se cuestiona ye’l fechu de qu’esa opción tenga que ser financiada con dineru público.

Esperamos que la nueva Llei dexe resolver vieyos pleitos como la presencia de la Relixón como asignatura d’ufierta obligada nel currículu. Que la so nota forme parte del espediente del alumnáu paeznos un datu abondo elocuente de lo llueñe que tamos inda d’un “modelu laicu de sociedá”

Secretariáu de SUATEA, Uviéu a 15 de payares de 2020