SUATEA-CI esiximos la conversión en fixo del personal interino

Miles de persones participen na manifestación en Madrid pa esixir la conversión en fixos del personal interino

SUATEA participa na manifestación y la Confederación Intersindical aprueba una Resolución nel so Plenu Confederal en defensa del personal interino y dela so funcionarización.

Miles de persones participamos el sábadu 15 de febreru na manifestación convocada pol colectivu de personal interino de tol Estáu. La movilización pretendía denunciar el fraude de llei en que s’atopen y esixir la conversión en fixos como solución p’ acabar cola situación de fraude de llei.

L’Alcuerdu pola “meyora” del empléu públicu, robláu en 2017 por CCOO, UXT y CSIF col anterior gobiernu de Rajoy, supón sacar a Ufierta d’Empléu Públicu toles places ocupaes a lo llargo de más de trés años por personal temporal, lo que va perxudicar al personal interino porque pretende estabilizar les places, pero non a les persones que les ocupen, lo que provoca y va provocar que miles de persones queden na cai. 

Dende SUATEA valoramos positivamente’l gran siguimientu que tuvo la movilización d’esta fin de selmana, pues participaron colectivos que llegaron de tolos territorios del Estáu y de los distintos sectores de la función pública: profesoráu, sanidá, xusticia, alministración local, empreses públiques y función pública polo xeneral.

Dende SUATEA, consideramos inadmitible que miles de profesionales de los distintos sectores de la función pública, que sufrieron la situación de fraude de llei a lo llargo d’años ya inclusive décades, nun tengan derechu a convertise en funcionarios de carrera y que vean apeligrar la so continuidá nel empléu pola convocatoria d’oposiciones masives y d’ingresu llibre. Por ello, dende SUATEA, encamentamos al nuevu gobiernu a qu’escuche al personal interino y qu’atienda les sos reivindicaciones.

Pa cumplir estos oxetivos, SUATEA va siguir alantre cola demanda xudicial, cola que pretendemos llograr la estabilidá definitiva pal colectivu interín.  Amás, vamos siguir llevando a cabu distintes acciones (xudiciales, polítiques, movilizaciones, etc.) y sofitando cuantes movilizaciones se convoquen p’algamar l’oxetivu del afitamientu del personal interino y evitar que nenguna persona quede ensin trabayu.

Coles mesmes, el Plenu de la Confederación Intersindical aprobó na mañana del sábadu 15 de febreru, celebráu tamién en Madrid, una resolución na qu’encamienta al gobiernu estatal a solucionar esta problemática y consiguir la funcionarización del personal interino.