SUATEA considera una falacia el pactu PP-C’s en materia educativo

SUATEA califica de falacia y de puru teatru’l pactu alcanzáu pol Partíu Popular y Ciudadanos en materia educativo. L’alcuerdu encóntase na supuesta paralización de la LOMCE, cuando en realidá la Llei ta dafechu desenvuelta y mientres esti cursu qu’empieza va completase en 2^u y 4 ^u  d’ESO y en 2^u de Bachilleratu. Ye más, el gobiernu “en funciones” publicó’l pasáu 31 de xunetu un Real Decretu que regula les reválides en 4 ^u d’ESO y de 2 ^u de Bachilleratu, nun amosando nesta actuación nengún interés en paralizar esta Llei. Poro, consideramos qu’esi alcuerdu ye un brinde al sol, una suerte d’engañifa política d’escaparate que nun va camudar la realidá educativa cola que’l profesoráu y l’alumnáu se van enfrentar nos próximos díes cuando empiece’l nuevu cursu escolar.

Por eso, consideramos que ye absolutamente refugable que se mienta a tola ciudadanía y a la comunidá educativa en particular al treslladar que se va a paralizar (nunca s’utiliza la palabra “derogar”) una Llei que ta dafechu desenvuelta en prácticamente tolos sos aspeutos dende Primaria a Bachilleratu. Sicasí, nun s’esmolecieron de la inseguridá ya incertidume que xenera nel alumnáu de 4^u de Secundaria y 2^u  bachilleratu les nueves reválides, que, a pocos díes de qu’empiece’l cursu escolar, desconocen les materies de les que se van esaminar y cuálos van ser los criterios d’accesu a la universidá.

El PP aplicó’l rodiellu de la so mayoría absoluta, imponiendo retayos drásticos y midíes contraries a la escuela pública y, amás, adquirió compromisos cola Unión Europea que van suponer un nuevu hachazu a la Educación y Sanidá públiques, d’ende que duldemos de les sos verdaderes intenciones. Dende SUATEA y la Confederación de STEs esiximos un PACTU EDUCATIVU POLA ESCUELA PÚBLICA, qu’empiece pola eliminación  de los conciertos educativos, el fin de los retayos y la privatización. Dende SUATEA consideramos que nun se debe cayer nes trampes de quien pretende tracamundiar o manipular la realidá educativa y, por toes estes razones, vamos siguir trabayando por una educación pública de calidá, inclusiva, universal, llaica, democrática y al algame de toles persones.

Secretariáu d’Asturies de SUATEA

Uviéu, 31 d’agostu de 2016