SUATEA cuestiona la “procesión escolar” nel CP Villafría d’Uviéu

Esta mañana pudimos confirmar al traviés de la prensa lo que yá nos llegara en forma d’esmolición de delles families del centru: la escuela pública Villafría de Otero d’Uviéu va celebrar güei miércoles una procesión. Asina anúnciase qu’a media mañana, en plena xornada escolar, “sesenta neños” que cursen la materia de Relixón Católica van portar “vistíos de nazarenos y con capirotes” dos pasos: un Cristu Crucificáu y una Virxe de la Esperanza.

Confírmase tamién que l’agrupación musical Sagrado Corazón de Jesús, habitual de celebraciones relixoses en distintes llocalidaes asturianes, va apurrir l’acompañamientu musical al actu. Lo que nun s’esplica na noticia ye quien empobina a los y les menores na forma de portar les imaxes, yá que hasta’l día de güei les families del alumnáu que nun cursa relixón nun recibieron información sobro l’actividá que se va realizar, si la meteoroloxía torga procesionar peles cais del barriu, dientro de les instalaciones d’esti centru públicu.

Dende SUATEA entendemos la esmolición ente les families que dulden de la finalidá educativa d’esti tipu d’actos. Esti, amás, nun ta recoyíu na Programación Xeneral Añal publicada na web del centru, polo que ye de suponer que se planiaría – y, esperamos, aprobaría – a posteriori. Too ello paez apuntar a ciertu secretismu per parte de los o les promotores de la procesión. Esperamos que si la imaxe de la virxe que porten les criatures ye una recreación de la imaxe real a partir d’una muñeca, nun acaben denunciaes por nenguna hermandá como asocedió este mesmu mes cola Santina Queer que l’asociación AMA llevó a la manifestación del 8 de marzu en Villaviciosa.

Ente toles duldes que nos xenera esta “actividá complementaria”, la certidume de siempre: la relixón (nenguna relixón) nun tendría de tener un espaciu reserváu nes aules y nos currículos escolares, yá que cada familia ye llibre de tresmitir les sos creencies y valores a les sos fíes y fíos fuera del horariu llectivu. La Selmana Santa, con polémiques como la de la denuncia de la Santina Queer o la de la Cofradía de Sagunto torgando una vegada más participar a les muyeres nes sos procesiones, choquen frontalmente colos principios d’igualdá y tresmisión de verdaes científiques que tendríen de primar na educación, entá más na pública.

Como sindicatu, nun nos queda más que siguir sofitando a plataformes como Asturias Laica y campañes como la que se ta desarrollando por una Escuela Pública y Llaica. Eso, y esperar qu’esta mañana nun llueva pa que, a lo menos, la procesión de neños y neñes” salga a la cai y nun interrumpa l’actividá educativa de tol centru escolar.