La temporalidá resta calidá

La Conseyera d’Educación quier convencenos de que la tasa d’interinidá ye del 8% cuando, con una simple división, la realidá diz que cerca del 25% del profesoráu que ta trabayando n’Asturies ye interín. Los datos rescamplen:

• Hubo cerca de 2.800 axudicaciones interines na primera y segunda convocatoria de places de primeros de cursu. 
• El total de profesoráu (personal funcionario docente non universitario) presupuestao pal 2024 ye de 11.025.

Pero la señora Conseyera nun se conforma con eso. Agora trata de xustificar que nun se saquen places d’estabilización n’Educación porque se trespasen d’ésta conseyería 400 xubilaciones a Sanidá, igual qu’ésta lo fexo con Educación nel pasáu, enfrentando asina a la educación y la sanidá públiques. Pal SUATEA dambes dos son la base del estáu de bientar y merecen recursos pa garantizar los derechos a la educación y la salú de les asturianes y asturianos sía cual sía’l so nivel socioeconómicu. Paez mentira pa un gobiernu que presume de ser progresista que recatie places de profesoráu mentres sigue marafundiando millones d’euros na escuela concertada ensin nenguna xustificación. Esti nun ye un problema de recursos como se quier tresmitir a la sociedá; ye un problema de prioridaes polítiques, y pal gobiernu asturianu nin la educación nin la sanidá pública lo son.

Ye d‘agradecer que CCOO, UGT y CSIf s’unan a la postura que llevamos defendendo en solitario el SUATEA estos últimos años, nos que venimos denunciando el fraude continuáu na determinación de la plantiya orgánica (ver comunicáu:  https://suatea.org/es/los-presupuestos-asturianos-escuenden-una-plantiya-organica-fraudulenta/ ) al incluyir nella irregularmente bona parte del profesoráu interino. La unidá sindical ye fundamental pa ganar derechos y, nesti casu, el profesoráu interino ta nuna situación grande de vulnerabilidá debío a la so inestabilidá nel emplegu y l’abusu na so contratación temporal, que tien de solucionase cola so estabilización al traviés d’una ufierta amañosa de places.

La Conseyera xuega coles palabres y les cifres pa convencenos de que la interinidá esistente permítela la llegalidá; que toos esos nuevos compañeros y compañeres que cada cursu formen los nuesos claustros, munchos dende’l mesmu entamu, tán ellí puramente por sustituciones por enfermedá o complementos de los horarios d’equipos directivos. Añu tres d’añu, un cuartu de la mayoría de claustros camuda temporalmente, y nun se consideren eses places como vacantes estructurales y necesaries pal bon funcionamientu de los nuesos centros. 

Iguar esta situación ye posible entá estabilizando les plantiyes cola cobertura llegal que mos ufierta el Real Decreto-ley 5/2023, de 28 de junio, qu’abre un plazu estraordinariu pa ufiertar les places necesaries coles que dotar de solidez y calidá la educación pública. Apostemos polos servicios públicos creando una ufierta d’empléu públicu suficiente pa encarar los retos educativos de les asturianes y asturianos.

El Secretariáu de SUATEA
N’Uviéu, a 20 d’avientu de 2023