Si nun hai condiciones, aplazamientu de les oposiciones

La Conseyería d’Educación sigue dando pasos alantre pa la celebración d’unes oposiciones nel mes de xunu. Dende SUATEA venimos aportunando nel fechu de que l’actual situación de pandemia y la imprevisible evolución de la mesma convierten nun actu temerariu l’enfotu en realizar esti procesu selectivu, más allá de les crítiques señalaes hai meses referíes a la sobrecarga de trabayu del personal docente anguaño que torga la preparación en condiciones d’unes oposiciones nes que cada docente xuega‘l so puestu de trabayu.

Estos díes ta empezando a circular un borrador de protocolu de seguridá sanitaria nel que figuren les normes que van rexir en trabayu de los Tribunales mientres el procesu. Nel mesmu señálense una riestra de xeres a realizar polos mesmos Tribunales como son la organización, distribución ya identificación d’espacios comunes (accesu a les aules, zones de descansu, aseos, etc.), la realización de les pruebes nes aules y la preparación d’una zona reservada pal aisllamientu de persones con posibles síntomes compatibles con Covid 19.

Los Tribunales van tar encargaos de garantizar la distribución d’espacios calteniendo les distancies de seguridá entre’l personal aspirante, garantizar que cada espaciu tien xel hidroalcohólico, inspeccionar que les papeleres son de pedal, la esistencia d’una bolsa de basura específica pa la xestión de material d’un solu usu, la correcta ventilación, llimpieza y desinfección de los espacios, señalando inclusive la proporción  de llexía pa cada procesu de desinfección.

Dende SUATEA pensamos que les xeres del personal docente que forma parte, obligada, de los Tribunales nun tendríen de ser estes citaes, pero la Conseyería, escudándose nos famosos “criterios SESPA” que tolo soporten, paez dispuesta a convertir al conxuntu de docentes nun batallón de llimpieza y zafarranchu.

Esmoleznos sobremanera la esistencia d’una condición qu’obliga a toles persones aspirantes a roblar obligatoriamente una Declaración responsable so pena de nun poder participar nes pruebes. Nella comprométense a nun aportar a la prueba en casu de tar diagnosticáos d’infección activa de COVID 19 o tar nos postreros diez díes en contactu estrechu con persona afectada por COVID o tar guardando cuarentena.

Esi protocolu indica claramente que “Aquellos opositores que tengan síntomes compatibles con COVID19,… NUN van poder aportar a los llugares indicaos polos tribunales pa realizar los exames”. L’actual Alcuerdu d’Interinidá vixente n’Asturies, obliga a presentase a oposiciones, nun esiste la previsión d’ausencia del exame más alló de tar de partu nel hospital y, anguaño, de manera estraordinaria, por andada de COVID 19 con xustificante médicu. Según los términos d’esti protocolu, cualquier persona con fiebre, independientemente de cuál sía l’orixe de la mesma, nun va poder faer l’exame magar que nel mesmu, xuéguese’l so puestu de trabayu. Encamiéntase tomar la prevención de autoaisllamientu diez díes antes de la prueba, eso sí, allegando diariamente al so puestu de trabayu onde va tar en contactu con delles decenes d’alumnos y alumnes.

Mención especial merez la vacunación. Yá denunciemos que’l calendariu d’oposiciones va asolapar cola inoculación de la segunda dosis, si ye que se llogren esclariar tolos aspeutos confusos qu’arrodien el procesu y col aberrante calendariu previstu pa rematar el cursu. Conforme se van conociendo más datos, amóntase la nuesa esmolición y el nuesu refugu a la celebración d’un procesu selectivu ensin garantíes. Creemos que retardar esa celebración ye una necesidá inminente. Nin el personal funcionario de carrera presente nos Tribunales tien de sentise devasáu por xeres que nun-y pertenecen y de les que nun son espertos, nin el personal aspirante tendría de sometese a unes midíes obligatories que creemos entepasen llendes morales (contradicción entre seguridá sanitaria colectiva y derechu a caltener el puestu de trabayu). Dende SUATEA siguimos pensando que retardar les oposiciones hasta que se garanticen condiciones socio-sanitaries ye la meyor opción.

El Secretariáu de Suatea

N’Uviéu a 19 d’abril de 2021