22 d’abril: Día Internacional de les neñes nes TIC

El cuartu xueves d’esti mes  d’abril celebrase’l Día Internacional de les Neñes nes TIC, que tien por oxetu afalar a les neñes y a les moces a considerar la posibilidá d’empobinar los sos estudios y oficios al campu creciente de les TIC, y empoderales pa ello.

Para entamar, ye necesario clarificar el conceutu de fienda dixital de xéneru, que l’Institutu Nacional d’Estadística define como “la diferencia del porcentaxe d’homes y el porcentaxe de muyeres nos indicadores TIC (usu d’internet nos postreros trés meses, usu frecuente d’internet, compres per internet) espresada en puntos porcentuales”. Oxfam Intermón especifica qu’esti conceutu refierse a la inferioridá que tien la muyer con respectu al home nel accesu a la información, conocencia y educación por aciu les Tics.

En 2019, la Secretaría d’Estáu para la Meyora Dixital publicó’l Llibru Blancu de les muyeres nel ámbitu tecnolóxicu, nel  que s’analicen los factores qu’inciden na fienda dixital de xéneru nel sector tecnolóxicu, y nel  que se proponen midíes p’amenorgar les desigualdaes. Conclúi que ye responsabilidá de toos y de toes: del sistema educativu, de les families, de los gobiernos, de les tecnolóxiques, de los medios de comunicación, de quien tán en contactu con neñes y neños, con mozos, de quien producen conteníos empobinaos a la infancia y a la mocedá, de los medios de comunicación, etc.

Tal que afirmen González-Palencia, R. y Jiménez, C. en La fienda de xéneru na educación tecnolóxica: “Si tomamos como puntu de partida que nun esiste una diferencia reseñable de capacidá ente homes y muyeres en talentu matemático, ye menester afondar en factores como l’interés, l’enfotu, la motivación y el autoconceptu pa intentar esplicar por qué les moces siéntense menos segures y menos atraíes que los sos compañeros paisanos escontra esta ciencia instrumental.”

Recuéyese nel Llibru Blancu que cada vez más investigaciones rescamplen que los estereotipos de xéneru tán nel orixe d’esti fenómenu. Ye un aprendizaxe que s’empecipia na infancia y cuaya na adolescencia na elección de los estudios y los proyectos profesionales. La conciencia de que se ye un neñu o una neña yá se tien ente los dos y los trés años. Nos dos siguientes, ente los cuatro y los seis, aprienden que van ser una muyer o un home cuando crezan. A esa edá, los neños yá tienen una conocencia de lo que resulta afayadizo pa cada sexu según la cultura a la que pertenecen. A los cinco años tienen yá toa una constelación d’estereotipos. L’estereotipu de que los homes son meyores que les muyeres en matemátiques, informática o física, perxudica’l rendimientu de les muyeres nesti dominiu y socava el so interés en campos d’estudiu o actividaes d’ociu onde estes disciplines son riquíes con más intensidá. El xéneru tien impactu na percepción de les mesmes habilidaes.

Coles mesmes, el Fondu Monetariu Internacional sorraya los beneficios que tendría pa les economíes mundiales una participación equitativa de muyeres y homes nel mercáu de trabayu, qu’en dellos países podríen disparar el PIB hasta un 34%. La Organización Internacional del Trabayu (axencia de la ONU pal mundu del trabayu) calcula que si España cerrara la so fienda de xéneru llaboral un 25%, el so productu interior brutu crecería en 34 mil millones de dólares.

Dende la Organización de Muyeres de la Confederación Intersindical queremos aprovechar la conmemoración del Día Internacional de les Neñes nes Tics pa encamentar al conxuntu de la sociedá a actuar nel ámbitu que-y correspuenda (educadores, families, gobiernos, empreses tecnolóxiques, medios de comunicación, etc.)  p’amenorgar la fienda dixital de xéneru, gafa non solo pa les muyeres, sinón pal conxuntu de la sociedá. Nun puede haber una economía dixital nin una sociedá dixital ensin cuntar con más de la metá de la población, les muyeres.

22 de abril de 2021

Secretaría de la Muyer de SUATEA
Organización de Muyeres de la Confederación Intersindical