Valoración fuelga del 14A

Valoración de xornada de fuelga del 14 abril del profesoráu interíno

La convocatoria de fuelga de profesoráu interín pa güei, 14 d’abril de 2021, ta enmarcada por dos reivindicaciones fundamentales:

• L’aplazamientu de les oposiciones previstes pal branu de 2021 por cuenta de la inseguridá sanitaria xenerada pola andancia

• La negociación d’un nuevu Alcuerdu d’Interinidá que garantice una mayor estabilidá y qu’ameyore les condiciones del actual.

A falta de datos completos del impactu d’esti paru llaboral, yá que tovía falta’l cómputu del profesoráu que trabaya en xornada de tarde, siñalamos que’l siguimientu de la fuelga foi en redol al 35% del profesoráu interín, siendo más significativa la respuesta en Secundaria y en dellos centros de la redolada d’Uviéu, Xixón, Avilés y Cuenques. Ye importante siñalar la dificultá de llograr datos concretos porque cerca de la metá de la plantiya de personal interín tien contratos a media xornada, colo que la so presencia nos centros pue nun coincidir col miércoles.

Tocantes a la concentración convocada a les 12 de la mañana na Plaza España, a pesar de les restricciones y el cumplimientu de la distancia de seguranza, axuntáronse unes 300 persones (axuntamos semeyes), bastantes más de los que la Conseyería diz que secundaron la fuelga. El profesoráu interín va siguir cola llucha.

MOTIVACIONES

1. Esti cursu presentóse pal profesoráu con munches estorbises dende’l so aniciu. con una fuerte medría de la carga de trabayu debíu principalmente a la semipresencialida y a la readaptación del llabor docente a unes condiciones nueves. Too ello en medio del estrés y ansiedá que supon la medrana a los contaxos y recordemos que’l profesoráu ye’l tercer colectivu profesional con más seropositividá (11%) por COVID-19 depués el personal sanitario y sociu-sanitariu.

Nel casu del profesoráu interín, esta ansiedá medra énte la celebración d’unos procesos selectivos nos que se xueguen les sos espectatives y, na Comunidá d’Asturies, los sos puestos de trabayu. Hai que tener en cuenta que l’Alcuerdu d’interinidá obliga a presentase a les oposiciones y a facer la primer prueba completa con llectura incluyida. Menos en casu d’hospitalización per embarazu o partu, quien nun se presenten van salir de les llistes y van perder el so puestu de trabayu. ¿Pue garantizase que toles persones tán en condiciones de presentase? ¿Qué va pasar coles persones arimaes o en cuarentena? ¿Y les persones que reciban segunda dosis de vacuna de Astrazéneca en díes anteriores al empiezu del procesu selectivu y que sufran efectos secundarios? Toes estes cuestiones ocupen y esmolecen a les persones afectaes y nun hai respuestes.

La esmolición esiste n’otres CCAA y ello ye qu’hubo movilizaciones y/o convocatories de fuelga pol aplazamientu d’oposiciones: Valencia, Canaries, Aragón, Murcia. En delles CCAA nun ye obligatorio presentase a oposiciones pa siguir nes llistes (Cantabria, País Vascu, País Valencianu, etc.). N’otres, como en Galicia y en Castiella y Llión, yá decidieron que, énte la coxuntura sanitaria tan complicada, nun va ser obligatorio anguaño presentase a oposiciones para siguir en llistes y paez que’l mesmu camín va siguir Castiella La Mancha.

1. D’otru llau, vemos imprescindible la negociación d’un nuevu Alcuerdu de profesoráu interín qu’apurra estabilidá al colectivu. L’Alcuerdu a valir n’Asturies, robláu por ANPE y UXT en 2014, supon una discriminación flagrante pal profesoráu interín asturianu respectu al de Comunidaes de la nuestra redolada (Cantabria, Galicia, País Vascu, etc.), onde apuesten por apurrir una cierta estabilidá. Amás de que la esperiencia docente previa ta minusvalorada nel baremu de méritos y sobrevalorada la nota sacada nos procesos selectivos, les llistes rebarémense después de cada procesu selectivu, lo que trai rotación nel empléu y permanente inestabilidá.

N’otru sentíu, l’espíritu del Alcuerdu a valir, en base a les últimes sentencies, afáyase cada vez menos a los fundamentos de derechu español y comunitariu y, amás, allóñase enforma de los últimos informes publicaos por persones prestixoses del mundu de la xudicatura. L’índiz de temporalidá nes Alministraciones Públiques ye un grave problema que vien de llueñe y rique una intervención urxente. Les Alministraciones Públiques utilizaron la fórmula de contratar a personal interín, non pa resolver cuestiones temporales, puntuales y urxentes, como dexa la normativa, sinón para cubrir puestos y vacantes permanentes y estructurales.

La Directiva europea 1999/70/CE, nes sos clauses 4 y 5 afita que cuando se da una situación d’abusu la consecuencia ye que se tienen qu’aplicar mecanismos de sanción. La Directiva, d’obligáu cumplimientu polos Estaos Miembros, nun se trespunxo íntegramente al desenvolvimientu normativu internu, sinón al Estatutu de los trabayadores nel so artículu 15.5, pero non al sector públicu. La sentencia del Tribunal de Xusticia de la Unión Europea (TJUE), de 19 de marzu de2020, en base a la Directiva UE 1999/70, dictaminó qu’hubo abusu de temporalidá na contratación del personal interín de toles Alministraciones Públiques y que’l sistema de concursu-oposición de llibre concurrencia nun ye una sanción al abusu de la contratación temporal.

A la espera de que se busquen soluciones a nivel estatal pal personal interín que trabaya en fraude de llei (800.000 persones), y nesti sentíu hai delles iniciatives parlamentaries y mociones en marcha, tienen de metese cambeos lexislativos y regulatorios que vaigan na llínea del cumplimientu de la Directiva europea y la Sentencia del TJUE anantes mentaes, atendiendo dún llau al deber de les autoridaes de dar efectu al espíritu de la directiva, y a l’ausencia de tutela xudicial efectiva por incumplimientu de derechu européu na que s’atopen los afectaos, d’otru.

Queremos destacar l’aprobación nel Parlamentu Asturianu, per primer vegada n’España, de la Proposición non de Llei (PNL) presentada por Podemos (a la quel nengún grupu s’opúnxo) en referencia a dos puntos fundamentales: la paralización de los procesos selectivos por nun ser alcordes a derechu comnitariul y la inspección y regularización alministrativa por aciu fixeza de los afectaos. La discordancia esistente ente la voluntá de los nuestros políticos y la de la Conseyería d’Educación ye, cuandoquier, una amuesa de la falta d’empatía y de busca de soluciones más que clara d’esta postrera.

Ensin dulda, l’Alcuerdu d’interinidá a valir n’Asturies nun s’afaya pa nada a les pretensiones de la Directiva europea y les sentencies del TJUE yá que, después de los procesos selectivos, pue pasar que munches persones que tuvieron trabayando n’abusu de temporalidá per años o décades puen perder el so empléu.

Anque l’acción colectiva ta bien acutada y nun pudimos visitar los centros pa poder falar y recoyer opiniones ente tol personal afectáu como quixéremos, recibimos múltiples pidimientos pa que diéremos el pasu y denunciar esta situación. Por ello, al traviés de consultes y n’asamblea realizada’l día 18 de marzu, el colectivu interín manifestónos la so esmolición y refugu a la celebración de les oposiciones nesta coyuntura sanitaria y, n’analizando toles opciones, votóse mayoritariamente la convocatoria de fuelga de protesta pal día de güei.

A pesar de que l’acción colectiva ta bien acutada y de que nun pudimos visitar los centros pa poder falar y recoyer opiniones ente tol personal afectáu como quixéramos, recibimos múltiples pidimientos por que diéramos el pasu y denunciar esta situación. Por ello, al traviés de consultes y n’asamblea realizada’l día 18 de marzu, manifestáronnos la so esmolición y refugu a la celebración de les oposiciones nesta coxuntura sanitaria y, n’analizando toles opciones, votóse mayoritariamente la convocatoria de fuelga de protesta pal día de güei.