SUATEA refuga la propuesta de plantiyes

Acabante salir de la primer mesa de negociación de les plantiyes orgániques de profesoráu non universitario d’Asturies, la Conseyería d’Educación presentónos una propuesta que sigue na llínia continuista d’otros años.

Aumenta la plantiya en 140 puestos en comparanza col cursu pasáu, algamando con esta propuesta los 9378 puestos de funcionaráu de Carrera. La ruindá d’un aumentu de 140 puestos nin compensa los recortes sufríos nos últimos años nin atiende a les necesidaes reales de los centros.

L’oxetivu d’estabilizar unes plantiyes con más del 30% de personal interino (unes 3000 persones) en situaciones precaries de trabayu (más del 30% con medies xornaes) sigue perpetuándose nel tiempu.

Nun hai prueba dalguna de que se tea trabayando por cumplir coles mires d’estabilizar unes plantiyes nes que más del 30% ye personal interín, unes 3000 persones, qu’amás tán en situaciones precaries con más del 30% de medies xornaes.

Entendemos qu’habría qu’incrementar 417 puestos de Secundaria y otros tantos pal cuerpu de Maestros/es p’aplicar los encamientos de la Llei 4/2019 de 7 de marzu, pa la meyora de les condiciones pal desempeñu de la docencia”. Nun se reflexa na propuesta de plantiya la aplicación sistemática de la xornada de 18 hores en Secundaria; de la merma a les 23 hores lectives nel Cuerpu de Maestros/es, comprometíes pol anterior conseyeru p’axustar esti cursu nin tán nin s’espera por elles.

Desapaecen 32 puestos d’Apoyu al ámbitu sociollingüístico y científico-técnicu que suponen un importante retayu n’atención a la diversidá en Secundaria.

Nun se tien en cuenta tampoco la demanda d’amenorgamientu d’hores lectives pal profesoráu de más de 55 años (3500 persones), pa lo que sedría menester amontar más de 400 puestos.

Sigue siendo sangrante la perda de puestos na Educación Infantil (aproximao una ventena), siguiendo la tendencia de los dos cursos anteriores nos que se mermaron una trentena. El compromisu cola Escuela Infantil Pública ye fundamental al ser el pilar del Sistema Educativu y la fonte qu’abastez los centros d’alumnáu. Nun se se puen pesllar unidaes d’EI na Enseñanza Pública y siguir sovencionando les privaes.

Nes unidaes d’Educación Primaria, siguen inclumpiéndose los alcuerdos de plantiyes, pos non toles tutoríes de los grupos son atendíes por maestres/maestros qu’impartan toles aries de la especialidá de Primaria. Por ello hai tamién una merma de puestos d’esta especialidá.

La propuesta presentada empobínamos al caltenimientu de cotes insufribles de precariedá y consolida un modelu economicista al que poco-y importa la calidá educativa y la meyora de les condiciones llaborales del profesoráu.

El Secretariáu de SUATEA

Uviéu, 29 xineru de 2020