Refugamos unes plantiyes que prioricen amenorgar el gastu frente a dar más calidá educativa.

A primer hora de güei vienres, 10 de marzu, celebróse la segunda Mesa Sectorial de plantiyes d’Educación pal cursu 2023/2024. Nella tratáronse específicamente reclamaciones que los sindicatos recibimos de 44 centros educativos que nun fueron atendíes primeramente pola alministración. D’eses 44 alegaciones solo fueron atendíes les plantegaes por 3 centros, lo qu’aumenta la primer propuesta plantegada en 4 puestos más d’Educación Infantil y 1 de servicios a la comunidá, pasando de 9.519 a una plantiya orgánica total constituyida por 9.524 docentes.
Amontar, tres el procesu de “negociación” cola parte sindical, en 5 puestos la primer propuesta de plantiyes demuestra con cifres el despreciu contra les demandes que dende los centros educativos se plantegen, dende la conocencia a pie d’obra, de les necesidaes del alumnáu y del personal necesario p’atenderles.
Siguiendo coles cifres, estes demuestren la clara insuficiencia la plantiya orgánica compuesta por 9.519 profesores, pues ye necesario contratar a más de 3000 persones interines al empiezu de cada cursu p’algamar 12500 docentes que se precisen pa, entá asina, nun atender cola calidá óptima les necesidaes xeneraes.
Considerando que con esta escasa plantiya:
• Nun se reverten los retayos sufríos nestos años, sinón tolo contrario.
• Nun se potencia la Escuela Pública nin na zona rural nin na zona urbana onde compite cola privada.

• Nun dexa l’amenorgamientu d’hores llectives nel cuerpu de maestros nin l’amenorgamientu llectivu pa mayores de 55 años.
• Nun s’atiende afechiscamente a la diversidá del alumnáu pa promover la equidad.
• Nun se fai casu a la especificidá cultural y llingüística asturiana dotando la plantiya orgánica con profesoráu especialista nes nueses llingües propies.
• Nun se favorez la estabilización por aciu l’afitamientu nel so puestu de trabayu del personal interino del que s’abusó na so contratación temporal.
• Nun s’aprovecha la baxada de la natalidá para menguar ratios y caltener o ampliar plantiyes.
• Nun s’atiende debidamente la función tutorial de los grupos al priorizar cubrir los horarios de cada
área con especialistes distintos de la especialidá de Primaria p’amenorgar la contratación
de personal, frente a l’acumulación horaria d’un docente col mesmu grupu.
• Nun se cumplen los alcuerdos de plantiyes soscritos colos sindicatos.
Dende SUATEA refugamos la propuesta final de plantiya orgánica parl cursu 2023/2024
El Secretariáu de SUATEA
N’Uviéu a 10 de marzu de 2023