Informe de xunta del 6 de xunu. Novedaes.

INFORME XUNTA 6 DE XUNU: CALENDARIU AXUDICACIÓN, LLICENCIES POR ESTUDIOS, COMISIONES DE SERVICIU, PERMISU DE LACTANCIA. PROPUESTES DE SUATEA SOBRE PROTECCIÓN DE DATOS.

El pasáu miércoles, 6 de xunu de 2018, celebróse una xunta de la Dirección Xeneral de Personal Docente coles Organizaciones Sindicales con representación na Xunta de Personal Docente y tratáronse los siguientes asuntos:

• Calendariu de l’axudicaciones pal cursu 2018/2019

Dende SUATEA valoramos positivamente que se tuviera en cuenta la nuesa propuesta de que los pidimientos y axudicaciones de la convocatoria d’entamu’l cursu pa profesoráu interín seyan nuna única fase pa tolos cuerpos y especialidaes docentes. La primer propuesta d’una convocatoria en dos fases (una primera pa especialidaes ensin convocar a oposición y una segunda pa les convocaes) podría provocar que los aspirantes que tán en delles llistes tuvieren que decidir, na primer fase, si escoyer plaza nuna especialidá non convocada a oposición, ensin saber qué posibilidaes tendrían d’escoyer posteriormente una plaza na especialidá convocada.

A pesar d’esta meyora sustancial, propunximos que se reconsideren los plazos de la última propuesta porque nun s’afaen a la realidá, especialmente no que cinca al plazu p’apurrir calificaciones de quien opten por presentase n’otres CCAA, porque la fecha llende sería’l 25 de xunetu y ye posible qu’en munches d’elles nun concluyeren tovía los procesos selectivos nesa fecha. Plantegamos que s’amplíe esti plazu varios díes o qu’ufiertaren la posibilidá d’apurrir les calificaciones nel periodu d’alegaciones a les llistes provisionales, hasta’l 16 d’agostu. La rempuesta la Conseyería foi ambigua, aclarando depués que se va publicar una nota informativa nel portal Educastur na que se va detallar qué tipu de documentación tien d’apurrise dientro de los plazos establecíos pa ello y que les feches van permanecer inamovibles, esto ye: 23, 24 y 25 de xunetu.

–              Llicencies por estudiu

Ufiertárense 77 llicencies por estudios. Hubo 7 solicitúes, de les que fueron concedíes 5 y refugaes 2.

SUATEA propunxo que nel futuru tienen d’ameyorase los criterios que tienen que cumplir los trabayos d’investigación, pos hai una cierta indefinición y falta d’oxetividá.

–              Comisiones de serviciu

Entregáronmos les cifres resultantes de les comisiones de serviciu dempués d’estudiar les alegaciones. De les 154 solicitúes, 111 resolviéronse de forma favorable. D’éstes, 59 fueron concedíes a docentes con destín n’Asturies y 52 a docentes procedentes d’otres Comunidaes.

El Director informónos de que les llistes de les comisiones de serviciu van publicase namás por aciu DNI por aplicación de los cambeos en materia de protección de datos. SUATEA recordó qu’este mesmu marcu llegal tendría de tenese en cuenta nes llistes de personal interino, según la publicación de les calificaciones de los procesos selectivos.

–              Novedaes sobro’l permisu de lactancia

Les novedaes” sobro’l permisu de lactancia son, cuantimenos, catastrófiques, yá que suponen la deducción d’haberes pa 95 funcionaries, 49 de carrera y 46 interines, que dende xineru de 2016 disfrutaron del permisu de lactancia na modalidá acumulada. Esto va suponer un descuentu en nómina pa toes aquelles docentes funcionaries o interines que disfrutaron del permisu por lactancia acumulada y que nun tuvieron en situación activa (por excedencia, llicencia o ausencia de contratu) tolos díes naturales que resten de los 12 primeros meses de vida de la so fía o fíu, esto ye, unos 240 díes, una vez descontaes les 16 selmanes del permisu por maternidá. Too ello aplícase en base al nuevu apartáu 7 del artículu 14 del Decretu 72/2013, modificáu por Decretu 1/2016 de 27 de xineru, que diz textualmente: […]nel supuestu de que se sustituyera’l permisu de lactancia por un permisu retribuyíu qu’acumule en xornaes completes el tiempu correspondiente, y el personal funcionario dexara de prestar servicios enantes de completar les xornaes que se tuvieron en cuenta pa reconocer el permisu acumuláu, va efectuase la oportuna regularización nes sos retribuciones[…]. P’afondar más na miseria, esa regularización va cuntar dende la publicación del citáu Decretu 1/2016. Si yá mos paez grave l’aplicación d’un decretu que consideramos que supón un retayu de derechos rellacionaos cola maternidá y lactancia, paeznos d’una dureza estrema faelo con efectu retroactivu, ensin siquier alvertilo nel so momentu a les persones afectaes. Ablucaes énte la negativa clara a nun aplicar la retroactividá, na mesma xunta planteguemos que, polo menos, s’informe individualmente a caúna de les afectaes de en qué midida-yos afectaría l’aplicación d’esta modificación.

Mientres se llaven la cara con pequeños xestos hacia la igualdá de muyeres y homes (nueva asignatura optativa en 3º ESO, programes y proyectos d’adhesión voluntaria o la evaluación diagnóstica del panorama llaboral na Función Pública asturiana dende una perspectiva de xéneru), nel planu llaboral siguimos sufriendo l’aplicación amplificada de los retayos económicos y derechos sociales de les muyeres.

– Propuestes de SUATEA al respective la protección de datos

Tamién, queremos informavos de dellos cambeos no que cinca a la protección de datos per parte la Conseyería. Nes xuntes que se celebraron en febreru sobre les bases la convocatoria d’oposiciones, la Organización Sindical SUATEA presentó una serie d’enmiendes ente les que se proponía que, garantizando’l principiu de tresparencia y publicidá, se caltuviera’l derechu a la protección de datos, a la intimidá y privacidá de los aspirantes per aciu l’establecimientu d’un sistema de claves personales o similar p’acceder a los datos de baremu y a les notes de tolos candidatos de la so especialidá.

Esta propuesta de SUATEA respondía a qu’el 25 de mayu de 2018 entró a valir el Reglamentu (UE) 2016/679 del Parlamentu Européu y del Conseyu, de 27 d’abril de 2016, relativu a la protección de les persones físiques al respective’l tratamientu de datos personales y a la llibre circulación d’estos datos, aprobáu pola Unión Europea’l 25 de mayu de 2016, lo que xustifica tovía más la solicitud que se realizara dende esta Organización Sindical. Amás, nel añu 2015, l’Axencia Española de Protección de Datos emitió un informe relativu a la solicitú plantegada por un ciudadanu onde resuelve que, según la lexislación vixente en materia de protección de datos, el DNI tien abondu valor, por sí solu, p’acreditar la identidá de les persones.

Por estes razones, presentamos a la Conseyería d’Educación un informe xurídicu nel que s’enconta la nuesa propuesta d’emplegar un sistema de pseudonimización al traviés de claves o d’identificación  col númberu del Documentu Nacional d’Identidá, ensin incorporar los datos del nome y apellíos de los candidatos.

En vez de contestar a los nuesos pidimientos, l’Alministración aplica midíes de protección de datos publicando solamente’l DNI de les persones que llogren comisión de servicios, o inclusive creen un sistema d’accesu acutáu a les persones participantes pal concursu de places d’asesoríes de los Centros del Profesoráu y Recursos. Paez ser que’l profesoráu interín nun tien los mesmos derechos que’l profesoráu funcionariu de carrera. Dende SUATEA, vamos siguir esixendo a l’Alministración que, como responsable del tratamientu de los datos, tien d’aplicar de forma efectiva los principios de protección de datos con cuenta de cumplir los requisitos normativos y protexer los derechos de los afectaos.

Uviéu, 11 de mayu de 2018