Les esperances que xenera una nueva ministra Educación

SUATEA RECLAMA CAMBEOS TANTO ESTATALES COMO N’ASTURIES

Dempués d’años escuros pa la educación pública, con polítiques del PP qu’eliminaron profesoráu de les aules, aumentaron les ratios d’alumnáu, sufragaron escueles privaes que segreguen por sexu, eliminando’l funcionamientu democráticu nos centros, impusieron la reconocencia académica pa la enseñanza de la relixón, o acabaron con midíes que podríen garantizar la igualdá d’oportunidaes, ente otres cuestiones, agora paez que se va abrir un espaciu a la esperanza si efectivamente el PSOE cumple colo prometío.

Esperanza pa que derogue la LOMCE como manifestó cola Proposición non de Llei presentada nel Parlamentu, esperanza pa que la normativa qu’impunxo los recortes educativos, especialmente’l RD 14/2012, desapaezan  tamién y dexen d’esistir torgues llegales que impidan a la escuela pública salir d’esti pozu nel que quieren metela dende va tiempu.

Ye la hora de recuperar derechos llaborales del profesoráu, de solucionar de manera inclusiva’l problema de la enorme tasa d’interinidá de forma que nun suponga la esclusión llaboral de los afectaos, d’acabar colos conciertos, de fortalecer la coeducación nes aules, d’apostar pola atención a la diversidá y recuperar iniciatives qu’avancen nel papel de la escuela na compensación de desigualdaes.

Esperanza tamién pa que la nuesa Conseyería d’Educación dexe d’escudase nel Gobiernu central pa resalvar la so responsabilidá na situación de la educación asturiana. Pa que nun siga negándose a abrir un procesu de negociación sobre les condiciones llaborales del profesoráu, pa que dexe de recortar les plantiyes nos centros, que restaure los sofitos y favoreza los desdobles perdíos, pa que l’atención a la diversidá dexe de ser solo un enunciáu y se convierta nuna realidá, pa qu’esista un plan d’estabilidá pa les y los docentes interinos y p’acabar con situaciones enquistaes como l’ausencia de la especialidá pa la llingua asturiana.

Ensin poder escudase na so incompetencia frentre a los asuntos propios del Gobiernu del Estáu, el Sr. Conseyeru por iniciativa propia, escurez la nuesa esperanza, al disponer por sorpresa una nueva restricción nel permisu de lactancia del profesoráu. Al aplicase con calter retroactivu’l cambéu establecíu nel D 1/2016, va efectuase un descuentu en nómina a quien lu esfrutaren en determinaes circunstancies, ensin qu’enantes se-yos notificare tal situación. Siguimos sufriendo, poro n’Asturies, l’aplicación amplificada de los retayos económicos y derechos sociales.

¿Sustanciaránse tantes esperances?

El Secretariáu de SUATEA

N’Uviéu, a 7 de xunu de 2018