Fuelga profesoráu interino

Les Organizaciones sindicales SUATEA y SINTTA resolvieron convocar a la FUELGA a tol profesoráu interino d’Asturies el próximu 14 d’abril de 2021:  

• Pol aplazamientu de los procesos selectivos d’Educación convocaos pa los Cuerpos de profesoráu d’Enseñanza Secundaria, profesoráu Técnicu de Formación Profesional y profesoráu d’Escueles Oficiales d’Idiomes, el próximu mes de xunu de 2021 n’Asturies.
• Pola negociación d’un nuevu Alcuerdu d’Interinidá que garantice una mayor estabilidá.

1.- Aplazamientu de les oposiciones.

Porque esti cursu presentóse con munches dificultaes dende’l so entamu, dándo-y ‘una sobrecarga de trabayu al profesoráu, debío principalmente a la semipresencialidá y a la readaptación del llabor docente a unes condiciones nueves, que nun paez que vaigan menguar d’equí a poco. La prioridá pal personal docente ta siendo realizar el so llabor cola máxima profesionalidá pa rematar el cursu ensin que l’alumnáu quede perxudicáu nun escenariu tan complicáu. Too ello en mediu del estrés y l’ansiedá que supón la medrana a les andaes, cuidao que’l llabor docente implica’l contactu cercanu de cada docente con un eleváu volume d’alumnáu ensin cuntar coles midíes de protección necesaries en munchos casos. Nel casu del profesoráu interino, esta ansiedá miedra énte l’amenaza de convocatoria d’unos procesos selectivos nos que se xueguen les sos mires y, na Comunidá d’Asturies, los sos puestos de trabayu.

Porque si daqué caracteriza al momentu actual ye la imprevisibilidá de les situaciones que puedan xenerase nos próximos meses por cuenta de la evolución de la pandemia y siguir alantre col desenvolvimientu de los procesos selectivos 2021 nel ámbitu docente ye fanfarroniar d’una normalidá a la que-y falta muncho pa ser real.  Forzar la so celebración pue ser una temeridá.  Caltener estos procesos selectivos, col riesgu de que finalmente puean llegar a suspendese por cuenta un escenariu negativu, supondría que tol tiempu y esfuerzu emplegáu na so preparación cayeríen en sucu baxeru.

Amás, hai esmolición porque’l procesu de vacunación del personal docente, que se ta llevando a cabu n’Asturies dende últimos de marzu, podría acarretar serios entueyos pa les persones aspirantes y miembros de tribunales, pues va coincidir en munchos casos la inoculación de la segunda dosis de la vacuna cola fecha d’empiezu o desenvolvimientu de los procesos selectivos.

Porque dende un puntu de vista organizativu, va xenerase un auténticu caos nos centros, porque’l calendariu lectivu llega anguaño hasta’l 30 de xunu, con tolo que trai d’exames, xeres alministratives y burocrátiques, y qu’un porcentaxe eleváu de profesoráu que tien de cumplir estes funciones nos centros educativos va tar nes oposiciones como aspirante o como tribunal.

2. Nuevu Alcuerdu d’interinidá 

Consideramos imprescindible la negociación d’un nuevu Alcuerdu de profesoráu internino que dea estabilidá al colectivu. L’Alcuerdu en vigor n’Asturies foi robláu por ANPE y UXT en 2014 y, a les clares, supón una discriminación evidente pal profesoráu interino asturiano en comparanza coles de Comunidaes de la nuesa redolada. Llueñe d’apostar por dar una cierta estabilidá al colectivu interino valorando preferentemente la esperiencia docente (asina ye n’Andalucía, País vascu, Valencia, Galicia, Cataluña y Baleares, Cantabria), apostaron por establecer otros criterios, sobrevalorando la nota llograda nos procesos selectivos, lo que supón la renovación de llistes tres les oposiciones y la continua rotación nel empléu.  

Per otra parte, l’espíritu del Alcuerdu en vigor, en base a les últimes sentencies, afaise cada vez menos a los fundamentos del derechu español y européu y, amás, allóñase sustancialmente de los últimos informes publicaos por persones prestixoses del mundu de la xudicatura. L’índiz de temporalidá nes Alministraciones Públiques ye un grave problema que vien de llueñe y rique una intervención urxente. Les Alministraciones Públiques emplegaron la fórmula de contratar a personal interino, non pa resolver cuestiones temporales, puntuales y urxentes, como dexa la normativa, sinón pa cubrir puestos y vacantes permanentes y estructurales.

Ensin dulda, l’actual Alcuerdu d’interinidá n’Asturies nun s’afai nin de llueñe a les pretensiones de la Directiva europea y les sentencies del TXUE pues, tres los procesos selectivos, pue asoceder que munches persones que tuvieron trabayando n’abusu de temporalidá mientres años o décades puen perder el so empléu.  

Por too ello, consideramos absolutamente imprescindible ESTABILIZAR al profesoráu interino qu’anguaño ta trabayando n’abusu de contratación temporal y a tolo que quedó nel camín dempués d’años trabayando pa l’Alministración educativa. Y, per otru llau, ye necesario axustar un nuevu Alcuerdu que s’axuste a les pretensiones del derechu européu y la so supremacía, y que nun suponga’l despidu del profesoráu interino nel presente y nel futuru.

El Secretariáu de SUATEA

Uviéu 7 d’abril de 2021