SUATEA pol afitamientu de los puestos de trabayu

La Confederación Intersindical, de la que SUATEA forma parte, convocó un paru’l 18 de xunu en toles Alministraciones públiques pa reclamar l’afitamientu nel so puestu de trabayu del personal temporal ya interino que lleva años soportando l’abusu de la contratación temporal per parte d’eses alministraciones.

La urxencia d’esta convocatoria foi debida a la propuesta de reforma del EBEP presentada pol ministru de Política Territorial y Función Pública, Miquel Iceta, el pasáu 24 de mayu, na que s’adelantaben midíes bien esmolecedores p’amenorgar la temporalidá nel sector públicu ensin que, amás, nun s’estableciera nenguna solución pa sancionar l’abusu na contratación cometíu hasta agora.

La Mesa Xeneral de negociación prevista pal 4 xunu onde se diba aldericar el borrador d’Iceta suspendióse gracies, probablemente, a la indignación de los y les trabayadores que se víen direutamente empobinaos al paru, si nun s’entamaba una respuesta rápida y contundente pa intentar poner frenu a despropósitu talu. Por ello la Confederación Intersindical en collaboración con otres organizaciones y el sofitu de la Coordinadora Estatal de Personal Público Temporal, decidiera entamar con calter d’urxencia una fuelga en toles alministraciones pa esixir la retirada del citáu borrador y reclamar, otra vuelta más, que la sanción al abusu en fraude de llei sía la estabilización definitiva del personal afectao.

Pa SUATEA, la decisión plantegóse en términos bien complicaos. La fecha, consensuada a nivel estatal, coincidía equí cola viéspera de les oposiciones docentes; oposiciones, de les que solicitemos el so aplazamientu hasta recuperar la normalidá socio-sanitaria lo que pidimos delles veces a lo llargo d’esti cursu. Con esti fin, presentáronse más de mil firmes y convocóse una fuelga’l 14 d’abril; pero, entá asina, la rempuesta de la Conseyería d’Educación foi siguir alantre percima de too, tamién del personal exhausto.

Esto significa que yéremos conscientes de la dificultá pa garantizar una rempuesta positiva dende l’ámbitu docente. Asina y too, decidimos asumir la convocatoria cola idea d’abrir un espaciu que dexara al personal interino y llaboral temporal de les diverses Alministraciones exercer el so derechu a la fuelga, daqué que nos venía reclamando dende distintos ámbitos y que nenguna otra central sindical tuvo, nin paez tar, dispuesta a asumir.  

Tuvimos qu’entamar la convocatoria de la movilización nun tiempu récord, ensin posibilidá de visitar los centros escolares nin la mayoría de los centros alministrativos. Tuvimos que facelo en solitario, ensin apenes marxe pa poder ampliar la convocatoria de la fuelga, encarando toles torgues esistentes pa poder algamar los distintos llugares de trabayu. Magar toes estes condiciones adverses, y con dificultaes enormes pa poder pescudar cuántes persones secundaron el paru, la nuesa estimación ye que siquier un 5% del personal convocao n’Asturies secundó’l llamáu a la movilización.

Nesos díes asistimos a la ceremonia del tracamundiu per aciu l’espardimientu d’escritos firmaos por quien roblaron l’Alcuerdu de Estabilización nel Empléu del añu 2017, ufiertando agora más de lo mesmo: les OPEs como solución al problema de la temporalidá, tamién como sanción para quien tán en situación d’abusu.

Dende SUATEA siguimos pensando que la convocatoria de la movilización yera una necesidá imperiosa cola que responder a los planes del Ministeriu. Una fuelga que, nes condiciones desfavoratibles señalaes, algamó non menos d’un 5% de siguimientu, nun ye una derrota. N’otros territorios, el siguimientu foi enforma mayor y, sía que non, creemos qu’abrimos el calce pa qu’un sector bien importante de trabayadores de l’Alministración amuesen de forma contundente’l so refugu pola situación d’abusu que carecen.

Queremos manifestar el nuesu agradecimientu a toles persones que se movilizaron el pasáu día 18, lo mesmo qu’a quien nun pudieron facelo porque teníen qu’allegar obligatoriamente a unes oposiciones a otru día, o nun pudieron xunise al paru por formar parte d’unos servicios mínimos abusivos, fechu habitual per parte de les Alministraciones. SUATEA va siguir trabayando na llinia que siempres venimos calteniendo, na defensa incondicional de tolos puestos de trabayu, pola estabilización nel empléu del personal interino y llaboral temporal.

Quien tán, quédense. / Afitamientu de los puestos de trabayu. / Fixeza, yá.

Asturies 24 de xunu 2021