ENCUESTA. La irrupción de la IA en educación

Dende la Confederación de Sindicatos de Trabayadores y Trabayadores de la Enseñanza STEs-i ponemos en marcha la campaña “La irrupción de la IA na educación”, iniciativa que consideramos de gran relevancia pa promover la reflexón, l’analís y l’alderique al rodiu d’ún de los procesos más relevantes y tresformadores del sistema educativu d’anguaño: la incorporación de la intelixencia artificial nos procesos d’enseñu y aprendizaxe.

Pa ello diseñemos una encuesta, con dos partes estremaes, dirixíes tanto al profesoráu como al alumnáu. L’oxetivu principal ye conocer de primera mano les sos percepciones, vezos d’usu, espectatives y tamién les sos inquietúes en rellación con ferramientes como los asistentes virtuales, los sistemes de tutoría intelixente o los xeneradores de conteníu textual y multimedia.

¿Por qué ye importante contar cola participación del profesoráu?

Porque’l profesoráu ye’l verdaderu axente de cambéu nel aula. Les sos percepciones, esperiencies y resistencies frente a la intelixencia artificial determinen en gran midida cómo esta teunoloxía s’integra —o non— nos procesos d’enseñu-aprendizaxe. De la mesma manera, son ellos quien observen a diariu l’impautu real de la IA: dende l’usu de ferramientes per parte del alumnáu hasta los dilemes éticos y pedagóxicos que surden na correición, la evaluación o la deteición del fraude académicu. P’acabar, la IA tamién ufierta oportunidaes al profesoráu (automatización de xeres repetitives, xeneración de materiales personalizaos, análisis de datos de rendimientu, simplificación de la burocracia, etc.). Conocer el so grau d’aceptación y usu ye clave pa plantegar midíes eficaces como organización sindical.

¿Por qué ye importante contar cola participación del alumnáu?

Porque ellos son los protagonistes del cambéu y les sos voces resulten imprescindibles pa diseñar estratexes axustaes a la realidá. De la mesma manera, l’usu que faigan de la ferramienta afecta direutamente a la llabor del profesoráu.

Los resultaos de la encuesta van ponese a disposición de la comunidá educativa de forma anónima, pa que puedan emplegalos na so toma de decisiones, formación o debates internos sobre l’usu éticu de la IA. Van publicase esclusivamente de forma agregada y con fines educativos y d’investigación.

Esta campaña cuenta tamién cola realización d’un Encuentru virtual, que inclúi diferentes charles n’abiertu pa tol profesoráu analizando la IA dende diversos puntos de vista. NESTI ENLLAZE pueden ampliar la información y inscribise. Les feches de realización son ente’l miércoles 29 d’abril y el xueves 7 de mayu.

Confiamos en que esta iniciativa contribuya a que’l profesoráu refuerce la so visión sobre les fortalezes y debilidaes que conlleva la Intelixencia Artificial, de la que se derive un análisis críticu. En primer llugar, alrodiu de si ye necesaria la integración de la mesma nel entornu educativu y, nel so casu, de cómo debería acometese dicha integración.

Encuesta profesoráu (opción pa facela n’Asturianu arriba a la derecha)

Encuesta alumnado (opción pa facela n’Asturianu arriba a la derecha)