Día de la Educación Non Sexista

21 de xunu – DÍA DE LA EDUCACIÓN NON SEXISTA

Tal como ta’l patiu una nun sabe per ónde entamar esti comunicáu. Duldes ente lo que nos queda por facer -que ye abondo- o por tolo que yá fiximos pa que les aules sían caldía un espaciu más seguru pa neñes y neños, un espaciu de desenvolvimientu llibre onde nenguna de nós se sienta primida o forciada pa facer lo que nun deseya, dicir lo que nun piensa, vistir como nun-y apitez o xugar a lo que nun-y presta.

Caldía hai más aules onde nun sentise coaccionada por unos materiales didáuticos que nos dibuxen madres, cuidadores, enfermeres, y siempres guapes, per guapes a nós, y executivos, albañiles o fontaneros a ellos, y siempres fuertes, bien fuertes.

Caldía más centros onde nun se sentir llendada por docentes que dacuando quieren y nun puen y otres vegaes nun quieren nin puen educar ensin sexismu porque entá nun fueron formaos, sensibilizaes y concenciaos, que repiten modelos que nos amordacen a toes, lléndennos a toos.

Caldía más espacios educativos onde nun sentise amedranada por unes dinámiques de xuegu o por una distribución de los espacios con un claru siesgu sexista, qu’ufierten a dellos neños un patiu ampliu y seguru bastante como pa escoyer a qué xugar y a otres lo suficientemente llendáu ya inseguru como pa que nin siquier se planteguen delles actividaes.

Caldía hai menos aules onde nun sentinos torgaes por un currículu nel que la igualdá rescampla de puro ausente, onde namás los estudiamos a ellos na hestoria, na ciencia, etc., onde nunca hai tiempu p’aprender a resolver conflictos de forma non violenta, nin pa educación afeutiva y sexual, nin p’aprender a crear relaciones sanes ya igualitaries. La nueva llei educativa va ayudanos a ellaborar un currículu más igualitariu porque enantes de la llei yá tábemos nós construyendo, tresformando.

Quédamos muncho material que revisar, modificar y esaniciar, munches biblioteques nes que facer llimpieza, munchos espacios que redistribuyir, munchos xuegos qu’afayar, munchos conteníos que recuperar o esaniciar y munchos compañeros y compañeres que concenciar y sensibilizar, pero sabemos que tamos nel camín y que a pesar de nun se  mos fizo fácil nenguna de les conquistes de los nuesos lexítimos derechos, siempres consiguimos avanzar.

Nes nueses manes ta la posibilidá de camudar les nueses escueles y eso ye lo más guapo del nuesu trabayu. Celebremos el día de la educación non sexista porque eso ye reconocer qu’hai una educación sexista y qu’hai qu’acabar con ella.

Secretaría de la Muyer de SUATEA Organización

de Muyeres de la Confederación Intersindical