Fienda salarial de xéneru

 L’añu 2023 supunxo un finxu n’España tocantes a igualdá llaboral ente homes y muyeres no que cinca a la obligatoriedá de los planes d’igualdá pa toles empreses con más de 50 persones en plantiya; una bona ocasión pa ver ónde tamos en términos de fienda salarial de xéneru.

La fienda salarial ye ún d’esos temes que perpasó l’ámbitu especializáu y caltrió na sociedá. Un tema que nos fai mirar alredor y preguntar, “¿va ser posible?”

El datu brutu ye abondo bonu de consiguir si allegamos a los datos oficiales del INE. Equí tienes una síntesis: la ganancia media añal por trabayador. Antes de dir más llueñe, que conste qu’esta Encuesta añal d’estructura salarial, que foi publicada a mediaos de 2022, correspuende a 2020, ya inclúi la serie 2008-2020.

Pel momentu, y siempres recordando lo poco refinao de la cuenta, podemos estrayer dos enseñances:

Un home gana 27642,52 €, y una muyer 22467,48 €; si les cuentes nun fallen, eso son 5175,04 € de diferencia al añu, lo que significa un 18,72%. Esto ye, per cada euru que gana un home, una muyer gana 81,28 céntimos.

Si atendemos a la serie 2008-2020, tamos nel meyor de los escenarios conocíos hasta agora, qu’avezaba rondar el 22% la pasada década (con un tarrecible 23,99% en 2013).

Esiste un conxuntu complexu y de cutiu interrelacionáu de factores qu’anicien diferencies salariales d’homes y muyeres dando orixe a la fienda salarial de xéneru. A la valoración de les competencies llaborales, hai que xunir la segregación del mercáu de trabayu con distinta representación d’homes y muyeres nos distintos sectores económicos, les característiques de la ufierta d’empléu femenín condicionada en munchos casos pola conciliación de la vida familiar, la participación nel trabayu a tiempu parcial de les muyeres pola dedicación a actividaes de cuidu de neños, adultos dependientes y, los mecanismos establecíos de retribuciones salariales. Consecuentemente la fienda salarial ta condicionada por una serie de factores sociales, llegales, económicos, y constitúi un conceutu que va más allá de la premisa igual pagu por igual trabayu.

Ente les ocupaciones que destaquen por presentar importantes diferencies salariales ente homes y muyeres, na mayoría de los países inclúyense profesionales altamente cualificaos y ocupaciones STEM (ciencia, tecnoloxía, inxeniería y matemátiques), nes que les muyeres siguen tando infrarrepresentaes. Por casu, nel últimu añu pal que se dispón de datos, más del 80% de los países teníen una fienda salarial de xéneru de polo menos el5% pa los profesionales de les ciencies y l’inxeniería y los profesionales de la salú. Les diferencies salariales ente homes y muyeres son bien elevaes (más del 25%) nún de cada cuatro países pa los profesionales de la ciencia y l’inxeniería, y nún de cada trés países pa los profesionales de la salú. Les grandes diferencies salariales ente homes y muyeres ente los profesionales de la salú concuerden coles conclusiones recientes de que les diferencies salariales ente homes y muyeres nel sector sanitariu y asistencial tienden a ser mayores que n’otros sectores, y especialmente ente categoríes profesionales, y que’l trabayu de les muyeres, sobremanera nos sectores bien feminizaos, aveza tar infravaloráu. De la mesma, esiste una fienda salarial de xéneru de siquier el 5% ente los profesionales de les tecnoloxíes de la información y la comunicación (TIC) en casi trés de cuatro países con datos disponibles, y una fienda salarial de xéneru bien elevada, de más del 25%, nel 17% de los países. Per otra parte, ente los profesionales acomuñaos de la ciencia y l’inxeniería, esiste una fienda salarial en casi trés de cuatro países, y esta fienda ye bien alta n’aprosimao’l 40 % de los países.

Estos resultaos suxeren que, magar de delles meyores llindaes, queda muncho trabayu por faer p’algamar la igualdá de xéneru tamién no referente a fienda salarial. Precísense polítiques y acciones alcordaes de los gobiernos y los empleadores pa promover la participación de les muyeres na población activa, encetar la segregación de xéneru y aumentar la participación de les muyeres en puestos de lideralgu y STEM, asina como pa encetar les práctiques discriminatories de la ocupación y la remuneración, inclusive no tocante a la progresión profesional (por casu, al traviés de midíes de tresparencia salarial y principios y lleis d’igualdá salarial). Otres polítiques y práctiques útiles son la protección de la seguridá y la salú de les muyeres y la prevención de cualisquier discriminación, violencia y acosu sexual o moral; la inversión en política de cuidos y el fomentu de les responsabilidaes compartíes nesti ámbitu; y la garantía de que les muyeres tengan accesu a una protección social afecha en toles etapes de la so vida, lo cual ye fundamental p’apangar les interrupciones de la so carrera profesional.