Resume asamblees currículum LOMCE na ESO y Bachiller

Les asamblees de profesoráu convocaes el miércoles 24 de marzu alcordaron que van proponer movilizaciones a la vuelta de les vacaciones de primavera, en defensa del enseñu públicu y con tres pegollos fundamentales:

• Pidir l’aplazamientu de la implantación de la LOMCE n’Asturies: llamentóse la postura que ta calteniendo la Conseyería d’Educación que d’una parte refuga la Llei Wert pero que de la otra aplícala siguiendo’l dictáu del ministeriu col prexuiciu qu’esto xenera a tol alumnáu y al profesoráu, que, d’aplicase los currícula tal como ta plantegando la Conseyería, va ver en munchos casos como se suprimen los sos puestos de trabayu. Amás de la Llingua Asturiana, especialidaes como l’Apoyu al Area Práctica (desapaez la especialidá), los segundos idiomes, la Filosofía, les TICs y la Tecnoloxía, la Plástica, la Música, les llingües clásiques ente otres, van vese afectaes enforma col currículum de Secundaria y Bachiller.
• Constatóse la llaceriosa tramitación del currículum de Bachiller, onde tres obligar a los centros y a los sindicatos a facer les alegaciones al borrador, tres la denuncia pública de SUATEA remítese un nuevu borrador con cambeos qu’inda empiora más la situación de la Llingua Asturiana en Bachiller. La Conseyería remitiera un borrador a los centros y a los sindicatos, y díes dempués otru distintu al Conseyu Escolar d’Asturies. Esti tracamundiu foi detectáu por SUATEA y como consecuencia ábrese un nuevu plazu d’alegaciones al borrador nuevu ¡dientro de les vacaciones escolares!. Esiximos que s’amplíe’l plazu d’alegaciones durante la primer selmana tres la vuelta a les aules a partir del día 7 d’abril.
• La situación de la Llingua Asturiana, na que ye la Conseyería d’Educación quien tien tola responsabilidá de la so carga horaria, ye vergoñosa nel borrador del currículum: oblígase al alumnáu a escoyer ente la Llingua Asturiana y los segundos idiomes nos primeros cursos d’ESO o con un gran númberu d’optatives en 4u. d’ESO. Sicasí, la situación en Bachilleratu ye tovía pior: amás de reducir de 4 a 1 hora la carga horaria en 1u. y 2u. de Bachiller, plantega un itinerariu que fae prácticamente imposible que naide pueda seguilu en casu de querer cursar l’asignatura d’asturianu. La Conseyería sigue echando balones fuera no que cinca a la creación de la Especialidá de Llingua Asturiana, incumpliendo de forma flagrante los sos compromisos electorales y poniendo nun filu cientos de puestos de trabayu.
• Decidióse denunciar les dures condiciones llaborales nes que ta trabayando’l profesoráu n’Asturies: horarios sobrecargaos, hasta 7 guardies, imposibilidá material de coordinación del profesoráu,… Mientres, la Conseyería d’Educación negóse na reunión de la Xunta de Personal,que se celebraba al tiempu de l’asamblea, a almitir alguna de les reivindicaciones en materia de: reducción horaria pa mayores de 55 años que se contemplen la llei; meyora de les plantiyes docentes; tresparencia nel procesu d’oposiciones,…

Dellos centros de secundaria tienen esixío a la Conseyería la paralización de l’aplicación de los currícula LOMCE n’Asturies. Otros ficieron alegaciones en relación a la situación de la llingua asturiana (modelo d’alegaciones en materia de llingua asturiana).

Alcordóse proponer al restu d’Organizaciones Sindicales na Xunta de Personal Docente la convocatoria de movilizaciones a la vuelta de vacaciones pa reivindicar:

• La paralización de l’aplicación de la LOMCE n’Asturies y les sos consecuencies llaborales pa tol profesoráu y en munches de les especialidaes docentes.
• La reivindicación de la meyora de les condiciones llaborales de tol profesoráu na rede pública asturiana.
• La consideración de la Llingua Asturiana como un derechu y la reivindicación de la Especialidá de Llingua Asturiana.

N’Uviéu, a 26 de marzu