Propuestes de SUATEA al borrador de convocatoria de procesos selectivos 2022-24

I. PREVIU

Una vegada más, esta Organización Sindical presenta una serie de propuestes que consideramos qu’ensin dulda ameyoraríen los procesos selectivos y que daríen mayores garantíes a les persones aspirantes. Consideramos que son propuestes sensates, munches d’elles recoyíes nes convocatories d’otres CCAA y, en munchos casos, respuenden a los pidimientos qu’un añu tres otru treslládennos les persones aspirantes y miembros de tribunales.

     II. PROPUESTES XENERALES

Denunciamos que nun apaez nenguna plaza de LLingua Asturiana y Gallego Asturianu na convocatoria de concursu oposición d’estabilización incumpliéndose la Llei 20/2021, de 28 d’avientu, de midíes urxentes pal amenorgamientu de la temporalidá nel empléu públicu.

Proponemos que l’Alministración dea instrucciones clares pa que los tribunales propongan pruebes algamadices, oxetives y equilibraes y que s’esixa que los criterios de valoración y calificación sían claros, realistes y oxetivos.

Dende SUATEA siguimos defendiendo que nun sía necesari presentase al procesu selectivu pa siguir nes llistes d’interinidá. Sicasí, si esto nun fuera posible, solicitamos que cualquier persona que se presenta a la prueba A nun tenga la obligatoriedá de realizar la llectura nin la presentación de la parte B para caltenese en llistes d’interinidá.

     III. ALEGACIONES AL BORRADOR

Artículu 2. Requisitos específicos

Solución al profesoráu de FP que nun pueda presentase a esti procesu selectivu por nun afaese a los requisitos de titulación esixíos

Artículu 3. Solicitú de participación

Plantegamos que se caltenga’l procedimientu mistu de presentación de solicitúes tanto de forma electrónica como presencial, dambos procedimientos válidos según la llei 39/2015

– Les tases por derechos d’exame n’Asturies son enforma altes en comparanza coles de la mayoría de CCAA. Proponemos que se contemple la gratuidá en casu de persones en situación llegal de desempléu, de persones con discapacidá acreditada, families numberoses, víctimes de violencia de xéneru, etc.

Artículu 5. Órganos de selección

Proponemos introducir una referencia a les condiciones llaborales de los y los miembros de tribunales, poniendo una llende d’hores diaries. Esto va favorecer tamién el llabor evaluador que tienen qu’exercer.

Composición de los tribunales.

No rellacionao coles dispenses pa formar parte de los tribunales, proponemos que s’incluyan como causes de dispensa: tar en situación de permisu de maternidá o paternidá, adopción o acoyimientu, o acumuladura de lactancia; tener concedíu permisu d’amenorgamientu de xornada; riesgu mientres l’embaranzu; permisos por matrimoniu cuando les feches d’esfrute coincidan col procesu selectivu; quien tengan fíu o fía menor de trés años o persones dependientes de primer grau al so cargu; por exercer como vocal titular de tribunal na última convocatoria d’oposiciones. Na mayoría de CCAA recuéyense estes posibilidaes.

No referente a les funciones de los órganos de selección, dizse que “van aplicar na so actuación principios d’austeridá y axilidá nel desenvolvimientu de los procesos selectivos”. Proponemos que s’esanicien esos principios, pos los tribunales tienen de trabayar con medios materiales, ambiente favoratible y el tiempu oportunu pa realizar la so función de forma fayadiza.

Ente les funciones de la Comisión de selección, introduz que tienen de publicar los criterios d’evaluación, de calificación y de penalización de les distintes pruebes nun tiempu non inferior a 10 díes antes del empiezu de les pruebes. Proponemos que se garantice la publicación con siquier 1 mes d’antelación pa que dexe que los aspirantes puedan realizar el desenvolvimientu de les pruebes conforme a esos criterios ensin vese sometíos a la improvisación.

Artículu 6. Desenvolvimientu del concursu-oposición

Entamu. SUATEA propón que se realice actu de presentación común y obligatoriu pa tolos aspirantes de cada especialidá. Nesti actu pueden esclariase duldes sobre criterios de corrección, valoración de les pruebes y el material necesario pa les mesmes (aspeutos publicaos primeramente en educastur). Amás, va facilitar a los tribunales que tomen les midíes organizativas que consideren necesaries, incluyíes les d’aspirantes con discapacidá.

6. 2. Desenvolvimientu. Tocantes a los motivos que xustifiquen la non comparecencia al llamamientu únicu, inclúyense la hospitalización por motivos d’embaranzu y/o partu puramente. Hai munches causes de fuerza mayor que pueden xustificar la non comparecencia. Proponemos que s’incluyan como motivos xustificaos otres causes de fuerza mayor (fallecimientu familiares de primer grau, intervenciones quirúrxiques…). Nun ye de recibu que daquién pierda’l so puestu de trabayu por cualesquier circunstancia vital adversa que-y torgue realizar los procesos selectivos.

Artículu 7. Sistema de selección

Fase d’oposición.

Tocantes a la llectura obligatoria de la parte A énte’l tribunal, proponemos que los exercicios escritos se llean y valoren polos tribunales, salvaguardando l’anonimatu al traviés d’un sistema de pliques. Asturies ye una Comunidá Autónoma bien pequña y nun puede resalvase que ye fácil que puedan conocese dellos aspirantes y miembros del tribunal, lo que diría en contra del principiu d’igualdá que tien de primar en cualquier procesu d’esti tipu. En munchos territorios (Cantabria, Andalucía, La Rioxa, País Vascu, País Valencianu, Castiella-La Mancha, etc.) nun se realiza llectura pública obligatoria de la primer prueba y asina apaez reflexáu nes respectives convocatories. El mesmu RD 276/2007 establez nel so artículu 10.1h) esta posibilidá: “Naquelles pruebes escrites nes que nun se rica la esposición oral pol candidatu o llectura énte’l tribunal, tendrá de garantizase l’anonimatu de los aspirantes”.

Suxurimos la sentencia de la Sala contencioso-alministrativa del Tribunal Supremu de 26 de setiembre de 2017 (rec. 1553/2015), que caltién que tien de garantizase l’anonimatu de los aspirantes.

Rescamplar na convocatoria en qué va consistir la parte B pa delles especialidaes del cuerpu de maestros como les de Pedagoxía Terapéutica y Audición y Llinguaxe

En relación cola prueba B2, exerciciu de calter prácticu, solicitamos el desglose d’especialidaes nes que se va llevar a cabu esta prueba y se rescamñe lo más refechamente posible’l conteníu d’ella. Amás, proponemos qu’haya dos opciones pa que el/l’ aspirante escueya una. Tampoco consideramos necesario llendar el tiempu máximu d’esta prueba a dos hores y proponemos que’l tribunal pueda decidir ampliala a 3 ó 4 hores.

Artículu 8. Calificación

Al respective de la ponderación de les dos partes proponemos 40% parte A y 60% parte B naquelles especialidaes nes que nun esiste exerciciu de calter prácticu.

Anexu A:

• Nel apartáu II “Formación académica”, considerar como méritu les titulaciones de Grau, tal como asocede n’otres CCAA.

• Nes especialidaes de Llatín y Griegu puntúen los años trabayaos por Cultura Clásica con 0,7 puntos

• Nes especialidaes de Llingua Asturiana y Gallego-asturianu cúntese esa esperiencia en Primaria ya Infantil (pal cuerpu de maestros) y en Llingua Castellana y Lliteratura o la materia llingüística según la especialidá de cada aspirante (Secundaria), al nun tener posibilidá dalguna d’estabilizase pola so especialidá, por non esistir (0,7 puntos). Tener en cuenta los títulos d’Especialista o Espertu n’asturianu.

• Considerar la participación en cursos o actividaes de formación en calidá de director/a, coordinador/a, ponente o docente, tal como asocede n’otros territorios.

• Esclariar la situación del profesoráu con nivel avanzáu d’idiomes B2, yá que na convocatoria solo consta pa la so baremación el nivel C1, cuando se da la paradoxa de qu’hai docentes nestos momentos dando les asignatures en billingüe anguaño y hasta l’añu 2017 esti nivel considerábase l’avanzáu.