SUATEA saca ocho representantes nes elecciones sindicales

Nesti día, 1 d’avientu, celebráronse les elecciones sindicales nes que’l profesoráu elexió la representación na Xunta de Personal Docente y na Mesa Sectorial d’Educación.
Esti añu presentábense a les elecciones SUATEA, UGT, ANPE, CCOO, CSIF, CSI, USIPA y SINTTA. Toos, menos la CSI, SINTTA y USIPA, entren na Xunta de Personal por sacar más del 5% de los votos. Sicasí, saquen representación abonda pa entrar en Mesa Sectorial sólo los qu’algamen polo menos el 10% de los votos: ANPE, UGT, CCOO y SUATEA.
Los resultaos en númberu de delegaos/es pa la Xunta de Personal, a falta de la confirmación de datos oficiales, son estos:
ANPE: 13, CCOO: 12, SUATEA: 8, UGT 7 y CSIF: 5.

Repítese la mesma composición de la Mesa Sectorial, conformada por quien saquemos una representación superior al 10% de los votos emitíos.

Dende SUATEA valoramos les circunstancies estraordinaries que marcaron el desendolcu de tola lexislatura, determinada pola andancia y los sos efectos tanto nel profesoráu como nel conxuntu del sistema educativo. Dase too ello en medio d’un proceso de polarización social y derechización.

Esta situación coincidió con una fase utilizada pola Consejería pa vaciar la Mesa Sectorial de negociación y tamién con una parálisis de la Xunta de Personal con una presidencia que nun foi quien a xestionar alcuerdos ente los sindicatos miembros nin d’aconceyase pa tomar decisiones en defensa del conxuntu del profesoráu.

Esti 2022 presentáronse a les elecciones 8 sindicatos, lo qu’auguraba una posible atomización de los resultaos. A la espera de los datos definitivos, dende SUATEA tenemos que valorar como un elementu pernegativu la baxada curiosa de participación del personal docente na convocatoria electoral.

Con toles precauciones hasta que se confirmen los datos definitivos, SUATEA pasa de cuartu a tercer llugar, manteniendo’l númberu de delegaos y delegaes que tenía primero. Sicasí, tenemos que constatar que la baxada de participación repercutió también nos nuestros resultaos.

El procesu de derechización qu’afecta a tola sociedá tien el so espeyu nos resultaos del sector del Enseñu (con un censu de mil electores más que l’anterior convocatoria, precarizaos y na so mayoría a media xornada, la participación baxó casi venti puntos nesta ocasión). Tenemos que reconocer que mos prestaba otru resultáu.

En tou caso, queremos agradecer a tolos nuestros votantes, que se perafiten toles convocatories, l’apoyu recibíu. Aseguramos que SUATEA va siguir trabayando y lluchando a diario en defensa de la Escuela Pública asturiana y de los intereses del profesoráu.

Nun vamos a renunciar a aspiraciones que creemos siguen siendo necesaries y xustes: defensa inclaudicable de la rede educativa pública; un modelu d’escuela laica; la demanda d’un cuerpu únicu de docentes; la defensa del Asturianu y del Gallego- Asturiano; la homologación salarial col restu de CCAA; un compromisu pola coeducación y la igualdá de xéneru y pola prevención de la homofobia y los derechos de los colectivos LGTBi y otres meyores qu’ayuden a la equiparación de derechos colo existente n’otros territorios.
Tien especial interés pa SUATEA tol trabayu referíu al proceso estraordinariu d’estabilización. El nuestru sindicatu plantegó una propuesta distinta consistente na estabilización de les persones y non de les places. Queden pendientes batalles importantes nesti tema que vamos encarar ensin duldar.

Comprometémonos, en suma, a siguir lluchando p’algamar una Escuela Pública de calidá y una sociedá más xusta y democrática.

Uviéu, 1 d’avientu de 2022
El Secretariáu de SUATEA